1977-ci ildə Big Ear radio teleskopu tərəfindən aşkar edilən “Wow! Siqnalı”-nın sirri açılaraq həll olunub. Araşdırmaya görə, bu sirli siqnal əvvəldən hidrogenlə bağlı olub. 1977-ci ildə astronomlar Oxatan bürcü istiqamətindən gələn güclü və qeyri-adi radio siqnalı aşkar etmişdilər. Bu siqnalın tezliyi neytral hidrogenlə eyni idi və astronomlar əlaqə qurmağa çalışan yerdənkənar kəşfiyyatın (ETI) təbii olaraq bu tezlikdən istifadə edəcəyini proqnozlaşdırmışdılar.
O vaxtdan bəri siqnal SETI (Yerdənkənar Kəşfiyyat Axtarışı) dünyasında bir əfsanəyə çevrilməyi bacarmış və “Wow! Siqnalı” adlandırılmışdı. Yeni araşdırma isə 47 illik sirri deşifrə edib. Ümumiyyətlə nədir bu “Wow! Siqnalı”?. Ohio Dövlət Universitetinin Big Ear radio teleskopu 1970-ci illərin əvvəlindən 1995-ci ilə qədər davam edən tarixdə ən uzunmüddətli SETI proqramında istifadə edilmişdir. 1977-ci ildə Big Ear çox xüsusi bir siqnal aşkar etdi və bunu “Wow! Siqnalı” adlandırdı. Bu siqnal neytral hidrogen tezliyinə çox yaxın olan güclü dar zolaqlı radio siqnalı idi. Big Ear teleskopu artıq mövcud olmasa da, tədqiqatçılar bu siqnalın nə olduğunu öyrənməyə davam ediblər.
Siqnal, Big Ear-ın müşahidə edə bildiyi 72 saniyəlik müddət boyunca davam etmişdi. Bir neçə gündən sonra astronom Cerri R. Ehman bu siqnalı kompüterdə çap olunmuş kağızda görüb və onun yanında Wow! yazıb. Məhz bundan sonra bu siqnal “Wow! Siqnalı” adlandırılmağa başlanılıb. Siqnalın başqa adı isə 6EQUJ5-dir. Bəziləri bu siqnalın yad mənbədən gəldiyini düşünür, bəziləri isə bunun insan müdaxiləsi ola biləcəyini düşünürdü. Başqa bir qrup isə bu siqnalın açıqlana bilməyən təbiət hadisəsi olduğunu iddia edib. Puerto Riko Universitetinin Planet Yaşayış Laboratoriyası tərəfindən aparılan yeni araşdırma 2017-2020-ci illər arasında Arecibo Radio Teleskopundan əldə edilən məlumatların arxiv işinə əsaslanır. Müəlliflərin fikrincə, Arecibodan aparılan müşahidələr Big Ear-dakı müşahidələrə bənzəyir, lakin daha həssasdır, daha yaxşı temporal ayırdetmə qabiliyyətinə malikdir və qütbləşmə ölçmələrini ehtiva edir.
Tədqiqatçılar, “Wow! Siqnalı”-nın maqnit partlayışı və ya yumşaq qamma təkrarlayıcı (SGR) kimi güclü keçici şüalanma mənbəyindən hidrogen xəttindən stimullaşdırılmış emissiya nəticəsində yaranan qəfil flaşdan yarandığını fərz edir. Bu hadisələrin nadir hallarda həssas şəraitdə və uyğunlaşmalarda baş verdiyi qeyd olunur. Bu şərtlər yerinə yetirildikdə, hidrogen buludlarının bir neçə saniyə və ya dəqiqə ərzində əhəmiyyətli dərəcədə parlaması mümkündür. Tədqiqatçılar deyirlər ki, Big Ear 1977-ci ildə teleskopun baxış sahəsində bir neçə neytral hidrogen (H1) buludlarından birinin keçici parıltısı olub.
