Hibrid və elektrik avtomobilləri Çinin daxili bazarında əsas seqmentin yarıdan çoxunu tutur, lakin yüksək genişlənmə sürəti heç də hər kəs üçün müsbət təsir bağışlamır. Belə ki, ikinci rübün sonunda Çin bazarında yalnız iki avtomobil istehsalçısı gəlirli fəaliyyət göstərmək qabiliyyətini nümayiş etdirib. Beləliklə, təxminən 30 Çinli elektromobil istehsalçısından sadəcə ikisi rüb boyunca gəlir əldə etməyi bacarıb.
Qeyd edək ki, Çinli elektromobil istehsalçıları arasında gəlir əldə edən iki brend sadəcə BYD və Li Auto olub. Ümumiyyətlə, bu statistika South China Morning Post tərəfindən bildirilsə də, mənbə bütün istehsalçıların hələ rüblük nəticələrini tam bildirmədiklərini və buna görə də yekun nəticəni çıxarmaq üçün hələ tez olduğunu da bildirir. Rəsmi hesabatlarda indiyədək yalnız üç elektrik avtomobil istehsalçısı göstərilib: XPeng, Zeekr və Leapmotor, lakin bu istehsalçıların dövr ərzində ümumi xalis zərərləri 6 milyard dollara çatıb. Bu rəqəm bir il əvvəlkindən 20% azdır, lakin ekspertlər xəbərdarlıq edir ki, avtomobil istehsalçılarının son istehlakçılar üçün elektromobillərin qiymətini aşağı salmaqla satış həcmini artırmaq cəhdləri bütün sənayeyə zərər verə bilər.
BYD, təsirli istehsal miqyası və biznesinin şaquli inteqrasiyası səbəbindən böyük dərəcədə təhrik etdiyi şiddətli qiymət mübarizələri altında qalan bir bazarda öz gəlirliliyini qorumağı bacarır. Məsələ burasındadır ki, BYD həm də dünyanın ən böyük batareya istehsalçılarından biri olmağı bacarıb. Şirkət özünü nisbətən ucuz batareyalar ilə təmin edə bilir ki, bu da ona xərclərə qənaət etməyə imkan verir. İyulun sonunda hibrid və elektromobillərin satışı əvvəlki illə müqayisədə 36,9% artaraq Çin Xalq Respublikasının ilkin avtomobil bazarında satış həcminin 51,1%-ni təşkil edib. İyulda dünyada olan bütün plug-in hibrid və elektrik avtomobillərinin 60%-dən çoxu Çində satılıb. Goldman Sachs-ın bu ilin aprel ayında apardığı hesablamalara görə, BYD öz elektrik avtomobillərinin qiymətlərini daha 7% azaltsa, bu, bütün Çin sənayesi üçün yeni təhlükəyə səbəb olacaq. Çünki, rəqiblər istənilən halda buna əməl etmək məcburiyyətində qalacaqlar.
