WhatsApp istifadəçilərə stikerlərə səs əlavə etməyə imkan verən yeni funksiya üzərində işləyir. Yenilik sayəsində istifadəçilər öz hazırladıqları stikerləri qısa səs yazıları ilə birləşdirə biləcəklər. Bununla yanaşı, tətbiqin mesajlaşma ekranında da dizayn dəyişiklikləri gözlənilir.
Digital trends xəbər verir ki, istifadəçilər şəkillərdən hazırladıqları stikerlərə xüsusi səs düyməsi vasitəsilə audio əlavə edə biləcəklər.
Bunun üçün birbaşa tətbiq daxilində səs yazmaq və ya telefonda saxlanılan audiofaylı seçmək mümkün olacaq. Stikerlərə əlavə edilən səs yazılarının maksimal müddəti 10 saniyə təşkil edəcək.
Səsli stiker göndərildikdə qarşı tərəf onun üzərindəki səs işarəsinə toxunaraq audionu dinləyə biləcək. Beləliklə, istifadəçilər emosiyalarını yalnız şəkillərlə deyil, qısa səs effektləri və ifadələrlə də çatdıra biləcəklər.
Yenilik videolardan hazırlanan hərəkətli stikerləri də əhatə edəcək. Belə stikerlərdə mənbə videonun ilk beş saniyəlik səsindən avtomatik istifadə edilə biləcək. İstifadəçilər həmin səsi öz səsyazmaları və ya başqa audiofayllarla əvəz etmək imkanına da sahib olacaqlar.
WhatsApp stikerlərlə bağlı daha bir yeniliyi sınaqdan keçirir. Yeni seçim istifadəçilərə öz hazırladıqları stikerlərin ətrafındakı konturları silməyə imkan verəcək. Bu isə stikerlərin daha təmiz və sadə görünməsini təmin edəcək.
Tətbiqdə gözlənilən dəyişikliklər yalnız stikerlərlə məhdudlaşmır. WhatsApp mesaj yazma sahəsinin dizaynını da yeniləməyi planlaşdırır.
Hazırkı interfeysdə mətn yazma sahəsi və müxtəlif funksiyaların düymələri əsasən eyni sətirdə yerləşir. Sınaqdan keçirilən yeni dizaynda isə mesaj yazma sahəsi yuxarı, əlavə funksiyaların düymələri isə aşağı sətirə keçiriləcək.
İki sətirli yeni interfeys mesaj yazmaq üçün daha geniş sahə yaradacaq. Eyni zamanda fayl, şəkil və digər məzmunların əlavə edilməsi üçün nəzərdə tutulan düymələrə çıxışı asanlaşdıra bilər.
Yeni dizaynın gələcəkdə mesajlaşma ekranına əlavə funksiyalar və qısayollar yerləşdirmək üçün də daha əlverişli olacağı gözlənilir.
Hələlik həm səsli stikerlər, həm də yenilənmiş mesajlaşma interfeysi hazırlanma mərhələsindədir. WhatsApp funksiyaların bütün istifadəçilərə nə vaxt təqdim ediləcəyini açıqlamayıb. Sınaqların nəticəsindən asılı olaraq yeniliklərin son görünüşü və işləmə qaydası dəyişə bilər.
