Apple-ın yeni nəsil iPhone 18 smartfonunun dizaynını əks etdirdiyi iddia olunan görüntülər ortaya çıxıb. Sızdırılan şəkillərə əsasən, şirkət standart iPhone modelinin arxa kamera dizaynında əhəmiyyətli dəyişiklik etməyə hazırlaşır.
Gizmochina platfomasının iddialarına görə, iPhone 18-də əvvəlki modellərdən fərqli olaraq daha geniş, üfüqi kamera modulu istifadə ediləcək. Bununla belə, iki kamera obyektivi modulun daxilində şaquli formada yerləşdiriləcək.
Görüntülərdə kamera bloku telefonun arxa panelinin yuxarı hissəsi boyunca uzanır. LED flaş və digər sensorlar da həmin modulun daxilində yerləşdirilib. Smartfon gümüşü, çəhrayı və tünd göy rənglərdə göstərilir.
Lakin yayılan görüntülərin real prototipə, yoxsa ilkin dizayn nümunəsinə aid olduğu təsdiqlənməyib. Buna görə də Apple-ın yekun məhsulda məhz bu dizayndan istifadə edəcəyi hələlik məlum deyil.
Kamera xüsusiyyətlərində isə ciddi dəyişiklik gözlənilmir. Məlumatlara əsasən, iPhone 18 modeli 48 meqapiksellik əsas və 48 meqapiksellik ultra genişbucaqlı kameralarla təchiz ediləcək. Standart versiyada ayrıca telefoto kameranın olmayacağı bildirilir.
Yeni məlumatlar Apple-ın təqdimat qrafikini də dəyişə biləcəyini göstərir. İddialara görə, şirkət iPhone 18 Pro, iPhone 18 Pro Max və qatlana bilən iPhone Duo modellərini 2026-cı ilin payızında təqdim edəcək. Standart iPhone 18-in isə 2027-ci ilin yazında satışa çıxarılması gözlənilir.
Beləliklə, Apple ilk dəfə standart və Pro modellərinin təqdimatını fərqli dövrlərə bölə bilər. Bu strategiyanın istehsal yükünü azaltmaq, komponent xərclərini daha effektiv idarə etmək və ilin ilk yarısında da yeni iPhone təqdim etmək məqsədi daşıdığı bildirilir.
Texniki xüsusiyyətlərə gəlincə, iPhone 18-in Apple A20 prosessoru, 9 GB operativ yaddaş və minimum 256 GB daxili yaddaşla təchiz ediləcəyi iddia olunur.
Smartfonun 18 meqapiksellik ön kamera, Apple C2 modem və iOS 27 əməliyyat sistemi ilə təqdim ediləcəyi də gözlənilir. Cihazın suya və toza davamlılıq üzrə IP68 sertifikatını qoruyacağı bildirilir.
Mənbələrin məlumatına görə, standart iPhone 18-in istehsalına noyabrın sonunda başlanıla bilər. Lakin Apple hələlik nə cihazın dizaynını, nə texniki xüsusiyyətlərini, nə də təqdimat tarixini rəsmən təsdiqləyib.
