Bu dəfə Fransa prezidenti Emmanuel Makron Fransada saxlanılan Telegram-ın baş direktoru Pavel Durovla bağlı açıqlama verib. Xatırladaq ki, Telegram-ın qurucusu və baş direktoru Pavel Durov ötən gün platformada qanunsuz fəaliyyətlərə nəzarətin olmaması çərçivəsində açılan istintaqa görə saxlanılıb. Uzun müddətdir bir çox ölkənin hədəfində olan platforma anonim kommunikasiya infrastrukturu ilə bir çox zərərli qruplara ev sahibliyi edir.
Təxminən 1 milyard istifadəçisi olan platforma bir çox ölkədə böyük ictimai hərəkatların və qeyri-qanuni fəaliyyətlərin ünsiyyət mərkəzi rolunu oynayır. Bu mövzuda yayılan xəbərlərdən sonra açıqlama verən Fransa prezidenti Emmanuel Makron bildirib ki, “Pavel Durovun həbsindən sonra Fransa ilə bağlı yalan məlumat gördüm. Fransa ifadə və ünsiyyət azadlığına, innovasiyalara və sahibkarlıq ruhuna dərindən sadiqdir. Bu belə də qalacaq. Qanunun aliliyində vətəndaşların müdafiəsi və onların fundamental hüquqlarına hörmət edilməsi üçün həm sosial mediada, həm də real həyatda azadlıqlar hüquqi çərçivədə qorunur. Qanunun tətbiqi tam müstəqilliklə məhkəmə hakimiyyətinin üzərinə düşür. Telegram-ın baş direktorunun Fransa ərazisində həbsi davam edən cinayət araşdırması çərçivəsində baş tutub. Bu heç bir şəkildə siyasi qərar deyil. Bu məsələ ilə bağlı yekun qərarı hakimlər verəcək.”
Qeyd edək ki, Fransada saxlanılan Durov sadəcə 96 saat ərzində nəzarət altında ola bilər. Həbs müddəti başa çatdıqdan sonra hakim Durovun ya azadlığa buraxılması, ya da ona qarşı iddia qaldırması barədə qərar verəcək. Hazırda 12 müxtəlif cinayətlə üzləşdiyi deyilən Durovu bəzi iddialara görə 20 ilə yaxın həbs cəzası gözləyə bilər. Daha əvvəl isə Telegram açıqlama verərək bildirmişdi ki, “Telegram, Rəqəmsal Xidmətlər Aktı (DMA) daxil olmaqla, AB qanunlarına uyğundur. Platformada moderasiya sənaye standartları daxilindədir və daim təkmilləşdirilir. Pavel Durovun gizlədə biləcəyi heç nə yoxdur və tez-tez Avropaya səyahət edir. Platformanın və ya onun sahibinin həmin platformadan sui-istifadəyə görə məsuliyyət daşıdığını iddia etmək absurddur. Dünyada demək olar ki, bir milyard istifadəçi Telegram-dan ünsiyyət vasitəsi və həyati məlumat mənbəyi kimi istifadə edir”.
