ABŞ və Çin arasındakı əzəli mübahisə və ya mübarizə indi özünü texnologiyada büruzə verir. Belə ki, ABŞ prezidenti Joe Biden həssas məlumatları və kritik infrastrukturu ifşa etmək təhlükəsi ilə bağlı Çin avtomobilləri barədə xəbərdarlıq edib. Xatırladaq ki, ötən günlərdə eyni mövzu Çində də gündəmə gəlmişdi. Hətta Çin hökuməti bu mövzuda ciddi addımlar atmışdı. Qərara görə, ABŞ mərkəzli Tesla modellərini Çinin hərbi infrastrukturları olan və ya digər həssas məlumatların əldə edə biləcəyi ərazilərə buraxılması qadağan edilmişdi. İndi isə ABŞ eyni mövzuda işə qoyulub.
Qeyd edək ki, Ağ Ev Çindən gələn texnologiya əsaslı avtomobillər barədə istintaq başladır. The Register məbəsinin məlumatına görə, Biden “Ticarət Nazirinə, narahatlıq hissi yaradacaq ölkələrdən gələn texnologiya mərkəzli avtomobillər barədə istintaq aparması və tədbir görməsi barədə təlimat verdim” deyib. Açıqlamada məlum səbəblərə görə bununla bağlı tədbir görülməli olduğu bildirilib. Ümumiyyətlə, müasir avtomobillər, smartfonlar, naviqasiya sistemləri kritik infrastrukturlar və onları istehsal edən şirkətlərdən asılıdır. Biden-in fikrincə bütün toplanmış məlumatlar Çinə ötürülə bilər. Belə bir vəziyyətin olması isə ABŞ-ın milli təhlükəsizliyini birbaşa təhdid edir.
Bundan əlavə qeyd edək ki, Ağ Ev, bu avtomobillərə uzaqdan daxil olmağın və hərəkət halında olarkən onları qeyri-aktiv etməyin mümkün olduğunu xatırladıb. Biden-in rəsmi mövqeyi ondan ibarətdir ki, Çin qeyri-qanuni təcrübələrlə avtomobil bazarında hökmranlıq etmək istəyir. Onun sözlərinə görə, Çin Amerika bazarını bu cür təhlükə saçan avtomobillərlə doldururlar. Biden isə açıq şəkildə “Mən buna imkan verməyəcəyəm” dedi.
