Azərbaycan və İsrail arasında dostluq münasibətlərinin davam etdirilməsi fonunda İsrail Azərbaycana, xüsusilə müdafiə, enerji, su resursları, texnologiyalar və kibertəhlükəsizlik sahələrinə investisiyaların artırılmasında maraqlıdır.
Belə ki, bu barədə İsrailin xarici işlər naziri Gideon Saar Bakıda keçirilən Azərbaycan-İsrail biznes forumunda bildirib. “Bütün bu məsələləri Azərbaycanın iqtisadiyyat naziri Mikayıl Cabbarovla görüşüm zamanı ətraflı müzakirə etdim”, – G.Saar qeyd edib. O, əlavə edib ki, hər iki ölkə öz regionlarında sabitliyin dayağıdır və inkişaf etmiş iqtisadiyyata malikdir: “Biz bu strateji tərəfdaşlığı yeni səviyyəyə çıxarmağa – qarşılıqlı investisiyaları artırmağa və insanlar arasında əlaqələri dərinləşdirməyə çalışırıq. Əminəm ki, biz buna nail olacağıq”.
O həmçinin əlavə edib ki, iki ölkə arasında enerji əməkdaşlığı xüsusi əhəmiyyət kəsb edir: “SOCAR İsrailin şirkətindən 10% pay əldə edib. Bu etimadın, münasibətlərin irəliyə aparılmasının nümunəsidir. Azərbaycanda hər zaman yəhudilər sülh şəraitində yaşayıb və yaşamağa davam edir”.
