Tedspace və Holberton School Azerbaijan təşkilatçılığında ilin ilk böyük texnoloji sınağı hesab olunan AI4Cyber daxili hakatonu uğurla yekunlaşıb. Yanvarın 24-də Holberton Kampusunda baş tutan tədbir, gənc proqramçıların potensialını üzə çıxarmaq və innovativ yanaşmalarını sərgiləmək üçün unikal platforma rolunu oynayıb.
i Hakatonu çərçivəsində ümumilikdə 15 komanda bir araya gələrək Süni İntellekt və Kibertəhlükəsizliyin kəsişməsində real həllər yaratmaq üçün mübarizə aparıb. İştirakçılar tapşırıqların icrası zamanı Google AI alətləri və müxtəlif “open-source” texnologiyalarından istifadə edərək, müasir dövrün rəqəmsal təhdidlərinə qarşı yeni müdafiə mexanizmləri və həll yolları nümayiş etdiriblər.
Gərgin keçən yarış sadəcə texniki biliklərin yoxlanışı ilə məhdudlaşmayıb. Komandalar peşəkar mentorların dəstəyi ilə real layihə mühitində işləmək təcrübəsi qazanıb, problemlərə kreativ yanaşma nümayiş etdirib və güclü networking qurmaq imkanı əldə ediblər. Bu proses tələbələrə komanda şəklində işləməyin və məhdud zaman çərçivəsində nəticə əldə etməyin vacibliyini bir daha sübut edib.
Yarışın yekununda münsiflər heyətinin qiymətləndirməsinə əsasən fərqlənən komandalar müəyyənləşdirilib. Qaliblər xüsusi hədiyyələrlə mükafatlandırılıb, həmçinin layihələrini təqdim edən bütün iştirakçılara sertifikatlar təqdim olunub. Təşkilatçılar bildiriblər ki, bu cür tədbirlər tələbələrin praktiki inkişafında müstəsna rol oynayır.
Texnologiya sahəsində ilin ilk böyük hadisələrindən biri kimi yadda qalan AI4Cyber hakatonu, Holberton School Azerbaijan-da təhsilin praktiki tətbiqinə verilən önəmi bir daha nümayiş etdirib. Tələbələrin yüksək motivasiyası və təqdim olunan layihələrin keyfiyyəti gələcək yarışlar üçün də böyük ümidlər yaradıb.
