Hava limanında minik biletlərini axtarmaq və ya uçuşunuzdan əvvəl qeydiyyatdan keçməyə tələsmək tezliklə keçmişdə qala bilər. Birləşmiş Millətlər Təşkilatına bağlı Beynəlxalq Mülki Aviasiya Təşkilatı (ICAO) hava nəqliyyatını tamamilə dəyişəcək rəqəmsal səyahət sistemi üzərində işləyir. Planlaşdırılan bu inqilabi dəyişikliklər sərnişinlərə bütün səyahət prosesini mobil telefonları vasitəsilə idarə etməyə imkan verəcək. Beləliklə, minik biletləri və qeydiyyat prosedurlarının tarixə çevrilməsi ilə Aviasiyada rəqəmsal inqilab baş tutacaq.
ICAO-nun hazırladığı plana görə, artıq sərnişinlər pasport məlumatlarını rəqəmsal şəkildə saxlaya biləcək və “rəqəmsal səyahət etimadnaməsi” sayəsində artıq fiziki sənədləri daşımağa ehtiyac qalmayacaq. Uçuş bron edildikdən sonra səyahət sənədi sərnişinin telefonuna endiriləcək və bütün proses boyu avtomatik yenilənəcək. Minik bileti və ya ayrıca qeydiyyat tələb olunmayacaq. Biometrik texnologiyalar da yeni sistemin bir hissəsini təşkil edəcək. Sərnişinlər üz tanıma sistemi ilə şəxsiyyətlərini təsdiqləyərək hava limanlarında təhlükəsizlikdən keçə biləcəklər. Onların üzü skan edildikdən sonra aviaşirkət sistemləri sərnişinin gəldiyini dərhal tanıyacaq və təyyarəyə minmə prosesi avtomatik davam edəcək.
Bununla belə, yeni rəqəmsal sistem təkcə təyyarəyə minmə prosesini deyil, həm də birləşdirici reyslərdə yaşanan problemləri həll etmək məqsədi daşıyır. Məsələn, bir sərnişin hava şəraiti kimi xarici amillərə görə birləşdirici reysi buraxarsa, yeni uçuş məlumatları avtomatik olaraq onun telefonuna göndəriləcək. Sərnişinlər heç bir əlavə prosedur olmadan yeni təyyarəyə minə biləcəklər. Digər tərəfdən, planların uğurla həyata keçirilməsi üçün hava limanlarında üz tanıma texnologiyası və mobil cihazlardan pasportların oxunması kimi infrastruktur təkmilləşdirmələrinə ehtiyac duyulacağı bildirilir. Hər şey planlaşdırıldığı kimi getsə, bu rəqəmsallaşma sürəti növbəti üç il ərzində bütün dünyada tətbiq olunacaq.
