Elektromobillərin avtomobil həvəskarları tərəfindən sevilməməsinin ən böyük səbəblərindən biri mühərrik səsinin olmamasıdır. Bir çoxlarının fikrincə avtomobillə bağlılığı formalaşdıran və hissiyatı artıran ən böyük faktorlardan biri məhz səsboğuculardan yüksələn səsdir ki, bu effekt elektromobillərdə yoxdur. Porsche Taycan kimi idman üslublu elektromobillərdə elektrik mühərrikinin süni olaraq hazırlanmış səs sistemi mövcuddur. Lakin bu da istənilən qədər keyfiyyətli nəticə vermir. Aydın məsələdir ki, səs ucaldanlar ilə yaradılan süni səs və avtomobilin çıxardığı həqiqi səs arasında müqayisə edilməz bir fərq var. Yüksək həcmli mühərrikləri ilə diqqət çəkən Amerikanın Dodge firması maraqlı bir iddia ilə çıxış edərək, V8 mühərriki qədər yüksək səs çıxaran elektrikli avtomobil hazırladıqlarını bildirir. Elektromobilin konsepti ötən saatlarda nümayiş etdirilib.
Yeni elektrikli Dodge Charger Daytona SRT modeli hətta xüsusi elektromexaniki transmissiya ilə də təchiz edilib
Elektromobillər üçün bəlkə də yeni mərhlənin başlanğıcını qoyan Dodge brendi Charger Daytona SRT konseptində bir çox qəribəliyi bir yerə toplayıb. Belə ki, “Küçədən keçəndə heç kim görməzdən gəlməyəcək” prinsipi ilə hazırlanan elektromobil Hellcat modelləri qədər yüksək səs çıxaracaq. Təqribi 126 desibelə qədər yüksələn səs üçün Dodge brendi, Fratzonic Chambered Exhaust akustik adlı səsboğuculardan istifadə edib. Bəli, elektromobil və səsboğucular. Qəribə səslənsə də Dodge Charger Daytona SRT modeli elektromexaniki transmissiya aqreqatı alıb. Ona görə də elektromobil həqiqətən yüksək səviyyədə “elektrik mühərriki” səsi çıxarmağı bacaracaq.
Dodge Charger Daytona SRT elektrikli modelində eRupt adı verilən transmissiya sistemi olacaq. Bu elektromexaniki transmissiyanın detalları açıqlanmasa da sizə elektrikli avtomobilə quraşdırılmış ötürmələr arasında keçid etməyə imkan verəcək. Elektromobildə olan xüsusi transmissiya sistemi və elektrik mühərrikləri isə ciddi mühəndislik işləri hesabına hazırlanan səs gücləndirici kanallarla yüksək səs yaradacaq.
Elektromobilin dizaynı isə çox möhtəşəm alınıb. Radiator barmaqlığı tamamilə aerdinamikanın bir parçasına çevrilib. Həmin hissədə açılmış R-Wing kanalları kapotun üzəri boyunca arxa tərəfə uzanaraq müqavimət əmsalını əhəmiyyətli dərəcədə yaxşılaşdırır. Kanalın ortasında üçbucaq formalı Fratzonic loqotipi isə 1962 və 1976-cı illər arasında Dodge avtomobillərində işlədilib. Bundan sonra şirkətin yeni elektromobilləri bu loqotipə sahib olacaq.
2024-cü ildən etibarən satışa çıxarılacaq Dodge Charger Daytona SRT elektrikli modeli, brendin sahibi olan Stellantis şirkətinin 800 voltluq STLA Large batareya arxitekturası ilə 800 Km yürüyüş məsafəsi təmin etməlidir. Elektromobil 2 ədəd elektrik mühərriki ilə 700 at qüvvəsi hasil edəcək. Dodge şirkətinin bu elektrikli idman avtomobili 2 qapılı kimi görünsə də 4 nəfərin rahat əyləşməsi üçün arxa oturacaqlara malikdir. Eyni zamanda baqaj bölməsi avtomobilin salonuna daxil edilib. Gələcəkdə eyni platforma üzərində fərqli kuzovlu variantlar da istehsal ediləcəkdir.
Elektromobilin səsi isə aşağıdakı videoda tizer şəklində 1:55-dən etibarən rəsmi olaraq eşitdirilib. Yolda hərəkət zamanı necə səs çıxaracağı məlum deyil. Bəzilərinin fikrincə elektromobilin çıxardığı səs səs tozsoronı, bəzilərinin fikrincə isə yüksək səslə işləyən soyuducunu xatırladır. Öz fikrinizi rəylərdə qeyd edə bilərsiniz.
