Sürünən canlılar deyəndə ağlımıza gələn ilk heyvan olan ilanların gəzdiyini görmək olduqca təəccüblüdür. YouTuber Allen Pan ilanlara olan sevgisini nümayiş etdirmək məqsədi ilə belə bir icada imza atıb, yəni ilanlar üçün robot ayaqlar hazırlayıb. 1.8 milyon abunəçisi olan məşhur Youtuber Pan yeni videosunda cihazı əsl ilan üzərində sınayıb və “ayaqlarını itirdikləri” üçün ilanlara yazığı gəldiyini bildirib və bizimdə ağlımıza belə bir sual gəlir: İlanların buna ehtiyacı var? Bu xəbər başlığını görəndə onsuzda ətrafımızda yetərincə gəzən ilanlar var dedinizsə sizdə bizdənsiniz. Elə isə mövzuya daha ətraflı baxaq.
Belə ki, təkamül prosesində ayaqlarını itirən ilanlara yerimə qabiliyyətini geri qaytarmaq istədiyini ifadə edən Pan-in hazırladığı robot ayaqlar cihazı, şəffaf bədən və robot ayaqlardan ibarətdir. Noutbukdan idarə olunan robot ayaqlar boru şəklində şəffaf gövdəyə bərkidilib. Qurğu həm də ilanın sərbəst şəkildə içəri girib-çıxmasına şərait yaradır. Cihazı təqdim etdiyi videonun sonlarında Pan, icadını sınaqdan keçirmək üçün bir piton ilanını borc verməyə razı olan ilan yetişdiricisinə baş çəkir. Burada piton yuvasından çıxarıldıqdan sonra boruya doğru sürünür. Həmin müddətdə idarəetmə Pan-in noutbukunda olur. Yəni bu icad hələ ilanın özünü idarə edə biləcəyi texnologiya ilə təchiz edilməyib. Təcrübə boyunca ilan başını borunun digər ucundan çıxarmış vəziyyətdə uzanır və Pan cihazın hərəkətini dayandırdığı zaman heyvan borudan çıxır.
Elm adamlarının hesablamalarına görə, təxminən 100-150 milyon il əvvəl ilanların kiçik ayaqları var idi və sonra bu bədən üzvləri yavaş-yavaş yox olub. Mövzunun təkamül ilə əlaqəli olduğu hər bir müzakirədə olduğu kimi ilanlarında ayaqlarını niyə itirməsi barəsində də müxtəlif fikirlər var. Bəziləri iddia edirlər ki, ilanlar su mühitinə daha yaxşı uyğunlaşmaq üçün ayaqlarından “qurtulub”. Bəzi ekspertlər isə iddia edirlər ki, ayaqsız olmaq yerin altında hərəkət etməyi asanlaşdırdığına görə ilanlar bu formada təkamül ediblər.
Görürük ki, YouTuber Allen Pan bu təkamülün ilanlar üçün üzücü nəticələr gətirdiyini düşünür və onlara robot ayaqlar hazırlamaq qərarına gəlib. Bəs siz Pan-in bu icadı haqqında nə düşünürsünüz?
