Ötən gecə NASA kosmik elm üçün mühim hadisələrdən birinə imza atdı. Belə ki, James Webb kosmik teleskopu tərəfindən kainatın dərinliklərinin indiyə qədər qeydə alınan ilk rəngli görüntüsü bizlərə nümayiş etdirildi. Webb teleskopunun çəkdiyi bu görüntü baxdığımız kainatın ən dərin və inanılmaz dərəcədə yüksək detalları özündə birləşdirən infraqırmızı fotosu sayılır.
Dünyadan 1,5 milyon kilometr uzaqda işləyən James Webb-in çəkdiyi görüntülərdə nələr var?
Gördüyünüz fotonu qeydə alan James Webb teleskopu NIRCam adlanan yaxın infraqırmızı kameradan istifadə edir. Foto fərqli dalğa uzunluqlarındakı görüntülərin cəmindən ibarətdir və ümumilikdə 12,5 saatlıq birləşdirmə nəticəsində ərsəyə gəlmişdir. 0,6-5 mikron dalğa uzunluğu arasında işləyən NIRCam-in qeydə aldığı görüntüdəki şəkil, başını qaldırıb göyə baxdıqıda kainatın təqribi bir toz zərrəciyi boyda sahəsini özündə birləşdirir.
Görüntüdə SMACS 0723 qalaktika klasterinin 4,6 milyard il əvvəlki yaranma forması görünür. Bu klaster özlüyündə qravitasiya linzası funksiyası yerinə yetirdiyindən arxasındakı çox uzaqda olan qalaktikaları da görməyə imkan yaradır. Alimlərin fikrincə infraqırmızı kameranın bacarıqları 13,8 milyard il əvvəl yaşanmış böyük partlayış anına gedə biləcək qədər güclü ola bilər. Böyük partlayış anının tədqiqi kainatın bütün mərhlələrini bir-bir öyrənmək üçün əhəmiyyətlidir.
Qeyd edək ki, bu görüntüləri ötən gecə ABŞ prezidenti Joe Biden özü ictimaiyyətlə paylaşıb. James Webb teleskopu 6 aydır fəaliyyətdədir və keçən vaxt ərzində bu qədər mükəmməl nəticə verməsi insanlıq üçün böyük bir nailiyyət hesab olunur. NASA-nın hazırladığı Webb teleskopu 31 ildir fəaliyyətdə olan və kosmik elmə öz töhfəsini maksimum dərəcədə verən Hubble teleskopunun xələfi kimi görülür. Teleskopun çəkdiyi görüntülər isə bununla bitmir. Çəkilmiş görüntülərin davamı bu gün axşam saatlarında paylaşılacaq.
