Məşhur “şəffaf” smartfon Nothing Phone (1) modelinin davamçısı olan Nothing Phone (2) rəsmi olaraq təqdim olundu. Nothing Phone (1) modeli üzərinə vizual olaraq baxdıqda çox az, lakin detallı baxdıqda xırda-xırda bir çox yeniliyin olduğu bir smartfon qarşımıza çıxdı. Elə isə gəlin çox fərq etmədən yeniliyin nələrdən ibarət olduğuna yaxından nəzər salaq.
Nothing Phone (2) bizə nə vəd edir?
Smartfon yenə iPhone modellərini xatırladan gövdə dizaynını davam etdirir. Lakin buna baxmayaraq gövdənin ölçüsü əhəmiyyətli dərəcədə dəyişir. Çünki, smartfona 6.55 düym əvəzinə 6.7 düymlük ekran paneli quraşdırılır. Bu da əslində, bizə standart Android cihazlarla eyni ölçülərdə olan bir model olduğuna işarə edir. Ekran barədə detallara toxunmadan kənar çərçivələrin daha da nazikləşdiyini və selfi kamerasının mərkəzə alındığını qeyd etməliyik.
Arxa tərəfdə isə bizləri yeni 3D qapaq qarşılayır. Nədir bu yeni arxa qapaq desəniz, kənarlardan ortaya doğru qabaran bir dizayn tərzindən söhbət gedir. Şirkətin rəhbəri Carl Pei və şirkətin dizayn direktorunun sözlərinə görə bu üslub bizə daha yaxşı əldə tutuş hissiyatı yaradır. Arxa qapağa baxdıqda gördüyünüz dizayn işləmələri isə yenidən hazırlanıb. Nothing açıqlamasında bildirir ki, elementlərin daha keyfiyyətli görünməsi üçün Nothing Phone (2) modelində müxtəlif dəyişikliklər edilib.
Əsas yenilənmə isə özünü Glyph olaraq adlandırılan LED işıqların parçalara ayrılması və seyrəldilməsində göstərir. Parçalanmış dizayn böyük ölçülü cihazda həm LED işıqların gözü daha az yormasına imkan verir, həm də istifadəçiyə daha çox xüsusiləşdirmə imkanı tanıyır. Ayrı-ayrı parçaları istifadəçi özünə görə dəyişdirib müxtəlif tərzlərdə zəng tonu ilə ahəngdarlıq yarada bilər. Enerji sərfiyyatı baxımından isə bu parçalanma ciddi bir təsirə malik deyil. Xatırladaq ki, Carl Pei-in dediyinə görə smartfonun gövdəsi yalnız təkrar edilmiş alüminium və Corning Gorilla Glass imzalı şüşədən istifadə edib.
Smartfonun texniki imkanlar nələrdir?
Nothing Phone (2) modeli öz gücünü Snapdragon 8+ Gen 1 çipsetindən alır. Performans və enerji sərfiyyatı baxımından bu çipset TSMC istehsal prosesi ilə, əslində ideal seçimdir. Səbəblərinə məqalənin sonunda toxunacağıq. Nothing OS 2.0 ilə qutudan çıxır və uyğun olaraq 3 il Android, 4 il təhlükəsizlik yeniləməsi imkanı vəd edilir.
Ekran paneli baxımından isə simmetrik çərçivəli və Nothing Phone (1) ilə müqayisədə daha nazik 6.7 düymlük LTPO OLED ekran oaneli bizləri qarşılayır. Standart OLED ekranlı cihazlarla eyni parametrdə olan bu ekran 1-120Hz görüntü yeniləmə tezliyinə, 1080x2412p təsvir ölçüsünə və 1600 nitlik olduqca yaxşı pik parlaqlığa sahibdir. Həmişə açıq ekran xüsusiyyəti ilə təmin edilib və ekran altına yerləşdirilmiş optik barmaq izi skaneri mövcuddur.
Kamera parametrləri isə yenə təkmilləşdirilib, lakin ən güclüsü deyil. Buna baxmayaraq bu cihazla çəkilən görüntülərə baxdıqda keyfiyyət baxımından heç də məyus etməyən nəticələr ortaya qoyur. İlk növbədə əsas kamera kimi IMX890 quraşdırılıb ki, OIS və EIS ilə gücləndirilir. İkinci kameramız isə 50MP ISOCELL JN1 ultra-geniş bucaqlı sensoru ilə təmin olunub. Bu kamera eyni zaman makro kimi də işləyir. Texniki baxımdan əsas əksiklik telefoto kamerasının olmaması kimi görülür, amma cihaz əslində bu sensoru təklif edəcək seqmentdə deyil. Qeyd etdiyimiz kimi, bu səbəblərdən sonda danışacağıq. Əvvəlcə kamera barədə müzakirəni bitirmək lazımdır.
Nothing şirkəti proqram təminatına ciddi əhəmiyyət verən bir marka kimi bu smartfonun texniki imkanlarının suyunu sıxmağa yaxşı maraq göstərib. Ona görə də çəkilən şəkillərə baxsanız keyfiyyətin və detalların yaxşı işləndiyini görmək mümkündür. 4K keyfiyyətdə 60FPS, 32MP selfi kamerası ilə 1080P keyfiyyətdə 60FPS çəkilişlər kimi detallar müsbət kimi mütləq qeyd edilməlidir. Əgər yanlış düşünmürüksə, HDR funksiyasının rəngləri xeyli dolğun işləməsi isə kameranın keyfiyyətli olduğu baxımından biraz manipulyasiya edici hissiyat da yaşadır. Əsas məsələ, gecə performansına diqqət etməkdir. Bunun üçün də real testlərin aparılmasına ehtiyac var.
Yerdə qalan kiçik detallara baxsaq 4700 mAs həcmli batareyası 45 vatt naqilli, 15 vatt naqilsiz, 5 vatt tərs şarj dəstəkləyir. Həqiqi olmayan stereo səs sistemi (ekranın üstünə danışıqlar üçün yerləşdirilmiş dinamik hesabın), IP54 sertifikatı tipli detallar mövcuddur. Çəkisi 201 qram təşkil edir. Qutudan çıxan naqilin belə şəffaf dizayn tərzində gəlməsi Nothing Phone (2) üçün fərqli bir maraqlı detaldır. Glyph interfeysinin SDK və API-ları isə yaxın vaxtlarda hamı üçün əlçatan olacaq. Yəni arxa tərəfdəki LED işıqlar üçün necə istəsəniz xüsusiləşdirmə edə biləcəksiniz
Nothin Phone (2) modelinin qiyməti
Smartfon ilk dəfə Amerika bazarına da açıldığından qiymətlər biraz müxtəlifdir. Amerikada 599$, Avropada 679€ kimi bir qiymət etiketi 8-128GB başlanğıc versiyası üçün qarşımıza çıxır.
Yekun düşüncə və fikirlərimiz nələrdir?
Bu cihaz bəlli olduğu kimi heç də flaqman sinifə aid deyil. Hətta qeyd etmək olar ki, hələ də şirkətin inkişaf mərhələsində olarkən çıxardığı Nothing Phone (1) ilə prinsipcə bənzər cihazdır. İstifadə etdiyi çipset və kamera parametrləri çıxdığı qiymət nəzərən flaqman qatili (rəqabətcil üst seqment) deyə biləcəyimiz cihazlar səviyyəsindədir. Ona görə də həm Snapdragon 8+ Gen 1 çipseti, həm də telefoto kamerasının olmaması normal haldır. Rəqiblər adətən bu qiymət səviyyəsində üçüncü kamera kimi dərinlik sensoru və.s quraşdıraraq göz boyamağı sevsə də Carl Pei-in fikrincə bu sadəcə axmaqlıqdır. Nothing Phone (2) modelini alıb-almamaq isə zövqə bağlıdır. Mükəmməl olub deyə bilmərik, amma ümumi nəzərən düşünsək pis deyil. Şirkətin həqiqətən qiyməti 1000 dollar və üzərində olan texniki cəhətdən limitlərdə olan cihaz təqdim etməsinə isə bu gedişlə hələ bir neçə il vaxt lazımdır.
Məqalədə işlədilmiş görüntülərin müəllif hüququ SuperSaf YouTube kanalına məxsusdur.
