Ötən gün Dövlət Statistika Komitəsi ənənəyə sadiq qalaraq 10 aylıq dövrdə İnformasiya və rabitə sahəsində fəaliyyət göstərən müəssisələr barədə hesabat dərc edib. Belə ki, dərc edilən hesabata görə 10 aylıq dövrdə Azərbaycanda mobil operatorların gəlirləri 1 milyard manatı ötüb.
İnformasiya və rabitə sahəsində fəaliyyət göstərən müəssisələr tərəfindən 2024-cü ilin yanvar-oktyabr aylarında əvvəlki ilin müvafiq dövrü ilə müqayisədə göstərilmiş xidmətlərin dəyəri real ifadədə 12.1% artaraq 2 863.6 milyon manat təşkil etmişdir. Qeyd edək ki, göstərilən bu xidmətlərin 72.3%-i də məhz əhali tərəfindən istehlak olunub. Xatırladaq ki, ötən ilin eyni dövründə bu göstərici 2 milyard 546.1 milyon manat təşkil etmişdi və bu xidmətlərin 73.1%-i əhali tərəfindən istehlak olunmuşdu. Bununla belə, real ifadədə ötən il artım 15.8% olsa da, bu il 12.1% təşkil edib.
Qeyd edək ki, xidmətlərdən əldə edilən gəlirin 35,1%-i və ya 1004,6 milyon manatı mobil telefon rabitəsi sahəsində formalaşıb. Ötən ilin eyni dövründə isə bu göstərici 37.6% və ya 957,3 milyon manat olmuşdu. Məhz bu il ilk dəfə olaraq Azərbaycanda mobil operatorların gəlirləri 1 milyard manatı ötərək rekord nəticə əldə edib.
Azərbaycanda ən sərfəli mobil internet paketi hansıdır? sualının cavabı sizə maraqlıdırsa, aşağıdakı məqaləyə keçid edə bilərsiniz.
