G7 və ya Böyük Yeddilik ölkələri süni intellekt texnologiyasını tənzimləmək barədə razılığa gəlib. Belə ki, G7 ölkələrinin nazirləri süni intellekt texnologiyasının riskə əsaslanan tənzimlənməsini qəbul edəcək. Xatırladaq ki, ötən günlərdə Avropa Birliyi də ChatGPT kimi süni intellekt alətlərinin qaydalara uyğun olmasını təmin etmək üçün süni intellekt qanunu barədə razılığa gəlmişdi. Ümumiyyətlə dünya ölkələri süni intellektin gələcəyindən narahatdır. Onlar yeni texnologiyanın gələcəkdə daha böyük təhlükələr yaradacağını düşünür. Qeyd edək ki, böyük yeddililə Almaniya, ABŞ, Birləşmiş Krallıq, İtaliya, Yaponiya, Kanada, Fransa aiddir.
G7 nazirlərini Yaponiyanın Takasaki şəhərində 2 günlük görüş keçirib. Nəticədə isə G7 ölkələri süni intellekt texnologiyası ilə bağlı bəyanat yayıb. Bəyanatda qeyd edilir ki, süni intellekt texnologiyalarının inkişafı üçün “açıq və əlverişli mühitdə dəstəklənməli” və demokratik dəyərlərə sahib olmalıdır. Həmçinin qeyd olunur ki, süni intellekt texnologiyası 5 prinsip ilə tənzimlənəcək. Bu prinsiplər tənzimləmə, müəllif hüquqlarının qorunması yolları, şəffaflığın təşviqi, dezinformasiya ilə mübarizə, o cümlədən qrup xaricindəki ölkələrin məlumat manipulyasiyası kimi mövzuları əhatə edir.
Onu da qeyd edək ki, Böyük Yeddilik üzvü olan İtaliya keçən ay ChatGPT kimi süni intellekt alətlərinin istifadəsini ölkə ərazisində məhdudlaşdırmışdı. Səbəbi isə şəxsi məlumatlar ilə bağlı qaydanın pozulub-pozulmadığını müəyyənləşdirmək idi. Qeyd edək ki, yeni razılığa əsasən süni intellekt texnologiyasının tənzimlənmə qaydaları müəyyənləşdiriləcək. Yaponiya mayın sonunda Hirosimada keçiriləcək G7 sammitinə ev sahibliyi edəcək. Baş nazir Fumio Kishida burada dünya liderləri ilə süni intellektin qaydalarını müzakirə edəcək.
