Smartfon bazarında rəqabət təməlini formalaşdıran ən əsas element nədir deyə sual versəniz, bəlkə də buna ən yaxşı cavab çipsetlər ola bilər. Çünki, bir smartfonun bütün komponentləri məhz çipsetin imkanları hesabına işləməyi bacarır. Keyfiyyətli kamera performansı axtarırsınızsa ən güclü kamera texnologiyalarını quraşdıra bilərsiniz. Lakin istifadə etdiyiniz çipset zəifdirsə, görüntü keyfiyyətli emal edilə bilməyəcək. Ya da dünyanın ən güclü texniki xüsusiyyətlərinə malik ekran panelini quraşdıra bilərsiniz. Bu dəfə də həmin ekrana veriləcək görüntünü işləyə bilən bir çipsetiniz olmasa ekranın imkanlarından faydalanmaq mümkün olmayacaq. Hətta ən sadə element kimi batareya belə öz işləmə ömrünü çipsetinin nə qədər enerji istehlak etməsinə borcludur. Yəni, bu gün Qualcomm Snapdragon, Apple Bionic A, MediaTek Dimensity, Samsung Exynos və.s kimi tanıdığınız mobil çipset brendləri, əslində düşündüyünüzdən də əhəmiyyətli rola malikdirlər. Lakin çox təəssüf ki, mobil çipset istehsal etmək çox çətin və bir o qədər məsuliyyətli bir işdir. Məsələn, Google şirkəti kimi nəhəng belə daha bir neçə ildir Google Pixel seriyasında özünə məxsus Google Tensor çipsetlərini işlətməyə başlayıb. Ortaya çıxan məlumatlara görə Oppo şirkəti də 1 il ərzində bu siyahıya qoşulmaq üçün MariSilicon çipseti (SoC) üzərində işləri sürətləndirib.
MariSilicon çipseti 3nm TSMC istehsal prosesi ilə hazırlıq mərhələsindədir!
Məşhur insayder IceUniverse, şirkətin 2024-cü ildə özünə məxsus mobil çipsetini anons etməyi planlaşdırdığını bildirib. İddialara görə MariSilicon çipseti TSMC istehsal prosesini mənimsəyəcək. TSMC-nin yeni nəsil 3nm texnoloji prosesindən yararlanmağı planlaşdıran şirkət bu çipseti flaqman smartfonlarına quraşdıracaq.
Eyni MediaTek Dimensity seriyasında olduğu kimi saf ARM arxitekturasını təmən alacağı gözlənilən çipset Cortex nüvələri (CPU) və Mali qrafik çipi (GPU) ilə gücləndiriləcək. Bu detal isə olduqca əhəmiyyətlidir. Çünki, nə qədər saf ARM arxitekturası təməl alınsa da, Qualcomm şirkətinin Kryo nüvələri kimi fərdiləşdirmələr olmasa belə sıfırdan hazırlanmış bir çipsetdən söhbət gedəcək. Gəlin, nə demək istədiyimizə nəzər salaq.
Belə ki, Google şirkətinin Tensor çipsetini xatırlayın. Google şirkəti sıfırdan yeni bir çipset hazırlamaq yerinə “Samsung Semiconductors” və ya bildiyiniz “Samsung Exynos” komandası ilə əməkdaşlıq etdi. Çünki, sıfırdan çipset hazırlamaq üçün yetəri qədər resursa sahib deyildi. Xüsusilə də çipset təkmilləşdirəcək mühəndislər tərəfində çətinliklər çox idi. MariSilicon isə tamamilə Oppo daxilindəki mühəndislər tərəfindən ehtimallara görə 4 ildən artıqdır inkişaf mərhələsindədir. Üstəlik ən önəmli detal isə mühəndislərin HiSilicon şirkətindən transfer edilməsidir. Huawei Kirin çipsetlərinin üzərində işləyən mühəndislər, 2021-ci il ərzində işlərini itirməyə başladıqda BBK qrupu daxilində OPPO şirkəti tərəfindən fürsət çox yaxşı dəyərləndirildi. Nəticə etibarilə, insayderlərin fikrincə OPPO MariSilicon seriyası çipsetləri ilə bazarda rəqabət yarada biləcək.
Qeyd edək ki, OPPO şirkəti hal-hazırda NPU adlandırdığımız neyron mühərriklərinin istehsalını 2 ildir ki, davam etdirir. MariSilicon X adı verilən çip smartfonlarda görüntü emalı, 18 TOPS səviyyəsində olduqca güclü süni intellekt dəstəyi və performans nəzarəti imkanına malikdir. Lakin bir çipset (SoC) olmadığı üçün, Snapdragon çipsetindən ayrı işlədilməsi mümkün deyil. Yeni çıxarılacaq çipset isə Snapdragon platformasını əvəzləmiş olacaq. Böyük bir ehtimalla OPPO Find X7 seriyası bu çipsetə malik ilk cihazlara sahiblik edəcək.
