Çinli texnologiya nəhəngi Xiaomi ötən gün məhsul çeşidi sırasında REDMI K80 seriyasını da əlavə edib. Beləliklə, səmərəli smartfon seriyası daxilində yeni K80 və K80 Pro modelləri yer alır.
İlk öncə qeyd edək ki, bu modellər qlobal bazarda REDMI K80 seriyası olaraq satışa çıxarılmır. Belə ki, Çində təqdimatı keçirilən K80 seriyası sadəcə Çin bazarı üçün satışa çıxarılır. REDMI K80 modeli maksimum 3200 nit parlaqlıq dəyərinə sahib olan 6,67 düymlük OLED ekran ilə təchiz edilib. Hansı ki, bu ekran 120 Hz yenilənmə tezliyi təqdim edir. Bundan əlavə, smartfon öz gücünü 4nm Snapdragon 8 Gen 3 çipsetindən alır.
Kamera tərəfində isə smartfon 20MP selfie kamerasına sahibdir. Arxa tərəfdə isə bizi OIS dəstəkli 50MP Light Fusion 800 və 8MP ultra geniş bucaqlı kamera sensorları qarşılayır. Xiaomi HyperOS 2.0 ilə qutusundan çıxan bu smartfon 90 Vt şarj dəstəkli 6500 mAs batareya həcminə sahib olub. Seriyanın bir digər modeli olan REDMI K80 Pro modeli isə mobil oyun və kamera fokuslu istifadəçiləri cəlb edəcək xüsusiyyətlərə malikdir. Smartfon 120 Vt sürətli şarj və 50 Vt simsiz şarj dəstəyi ilə 6000 mAs batareya həcminə sahibdir.
Redmi K80 Pro, 120Hz yeniləmə tezliyi və 3200 nit pik parlaqlıq təklif edən 6,67 düymlük 2K OLED düz panel ekranla gəlir. Ekranda həmçinin göz yorğunluğunu azaldan Xiaomi Qingshan Eye Care 2.0 texnologiyası da var. 3nm Snapdragon 8 Elite ilə təchiz edilən cihaz əvvəlki nəsillə müqayisədə 45 faiz CPU və 44 faiz GPU performans artımı vəd edir. K80 Pro-nun kamera sistemi də olduqca təsir edicidir. Belə ki, 50MP OIS dəstəkli əsas kamera canlı və ətraflı çəkilişlər üçün 13,2EV kinematik dinamik diapazon təklif edir. Həmçinin smartfon 32 meqapiksellik ultra geniş bucaqlı kamera və 2,5x optik böyütmə, 5x itkisiz böyütmə və 20x rəqəmsal böyütməni dəstəkləyən 50 meqapiksellik telefoto sensoruna sahibdir. Ön tərəfdə isə Selfie üçün 20MP kamera var.
REDMI K80 Pro ilə yanaşı, K80 və K80 Pro Champion Edition-ı da elan edib. Champion Edition çox fərqli dizaynı, qabaqcıl soyutma sistemi və əlavə oyun yönümlü xüsusiyyətləri ilə mobil oyunçuları cəlb edəcək. Qeyd edək ki, REDMI K80 və K80 Pro modelləri Çində müvafiq olaraq təxmini 345 dollar və 511 dollar başlanğıc qiyməti ilə satışa çıxarılıb.
