Ötən gün Samsung Galaxy S23 seriyasının təqdimat tədbirinin ardıyca smartfonlar barədə təqdimat məqaləsini, o cümlədən ilkin tanışlıq videosunu səhifələrimizdən yayımladıq. Cihazlarla artıq tanış olmusunzsa, böyük bir ehtimalla çoxlarınıza maraqlı olacağından gəlin performans barədə detallara daha yaxından baxaq. Çünki, Galaxy S23 seriyası sadə bir Snapdragon 8 Gen 2 çipseti ilə təchiz edilməmişdi. Samsung şirkəti Qualcomm ilə əməkdaşlıq edərək “Snapdragon 8 Gen 2 for Galaxy” adını verdiyi son illərdə texniki cəhətdən marka tərəfindən özəlləşdirildiyini gördüyümüz nadir nümunələrdən birini qarşımıza çıxardı.
Snapdragon 8 Gen 2 çipsetinin CPU və GPU tezliyi nə qədər artırılıb?
Bu çipset barədə texniki detallar ötən gün təqdimat tədbiri ərəfəsində məlum deyildi. Lakin artıq çipsetin texniki xüsusiyyətləri istər CPU, istər GPU cəhətdən təkmilləşdirmələrlə bizə məlumdur. Belə ki, ilk olaraq bildiyimiz kimi Snapdragon 8 Gen 2 for Galaxy çipsetində 1 ədəd yüksək performanslı Cortex-X3 nüvəsinin tezliyi 3.19 GHz yox, 3.36 GHz tezliyə sazlanıb.
2 ədəd 2.8 GHz tezlikli Cortex-A715 nüvəsi, 2 ədəd 2.8 GHz tezlikli Cortex-A710 nüvəsi və 3 ədəd 2.0 GHz tezlikli Cortex-A510 nüvəsində heç bir dəyişiklik edilməyib.
Lakin qrafik çipi, yəni GPU yüksək performanslı nüvə kimi sürət aşırdılıb. Standart vəziyyətdə 680 MHz tezlikdə işləyən Adreno 740 qrafik çipi Snapdragon 8 Gen 2 for Galaxy variantında 719 MHz tezliyə yüksəldilib. İnsayderlərin bildirdiyinə görə, biz əslində Snapdragon 8 Gen 2 for Galaxy adı altında gizlədilmiş Snapdragon 8+ Gen 2 çipsetinə baxırıq.
Bu ehtimalı biz də öz təqdimat məqaləmizdə dəyərləndirmişdik. İndi isə gəlin elə bu dəyərləndirmənin timsalında çipsetin analizinə və performans testlərinə nəzər yetirək.
Snapdragon 8 Gen 2 for Galaxy çipsetinin performans analizi və bəzi qəribəliklər nələrdir?
Gəlin mövzuya əvvəlcə performansa əvvəlki nəsillə müqayisədə dolayı olaraq təsir edən ilk nüansa nəzər yetirək. Aşağıdakı şəkildə Galaxy S22 və Galaxy S23 seriyası arasındakı soyutma texnologiyası arasındakı fərqi görürsünüz. Ən birinci diqqət çəkən nüans Galaxy S23 modelində Galaxy S22 ilə müqayisədə buxar qazanının əlavə olunmasıdır. Samsung şirkəti Galaxy S22 seriyasına sadəcə qrafit lövhə işlətmişdi. Lakin Galaxy S23 seriyasında buxar qazanına keçid edilərkən, eyni zamanda fiziki cəhətdən də ölçüsü böyüyüb.
Galaxy S23+ və Galaxy S23 Ultra modelləri də daha böyük ölçülü buxar qazanı ilə təchiz ediliblər. Xüsusilə Galaxy S23+ modelində gövdəsi nəzərən olduqca ideal nisbətdə buxar qazanı quraşdırıldığını görürük.
Beləliklə, performansa və isinmə problemlərinə dolayı olaraq təsir edən əsas detalımız bu seriyada yaxşı təkmilləşdirilib. İndi isə Snapdragon 8 Gen 2 for Galaxy barədə danışmaq vaxtıdır.
Geekbench testinə baxdıqda texniki cəhətdən üstünlüyü xüsusilə daha yaxşı termal soyutma texnologiyalarına malik Galaxy S23 Ultra modelində görmək olur. Çünki, eyni çipsetə malik Xiaomi 13 Pro modelinin geekbench testlərində Xiaomi 13 Pro modeli təkli nüvənin performansı nəzərən Galaxy S23 Ultra modelinin 1556 xallıq performansına çatmağı bacarmır.
Xiaomi 13 Pro modeli ilə fərqlərinə baxdıqda Vulkan testlərinə baxdıqda Galaxy S23 Ultra modeli öz rəqibi xeyli üstələyir. Eyni zamanda rəylərdəki fotolara baxdıqda 3D Mark testlərində də elə Galaxy S22 seriyasındakı Exynos 2200 ilə müqayisədə belə fərqin az qala 2 dəfəyə qədər artdığını görürsünüz.
Nəticədə Geekbench nəzərən CPU, 3D Mark nəzərən GPU performansı ayrı-ayrılıqda performansın zirvəsində görünür. Lakin araşdırma etdikdə biraz fərqli bir nəticə ortaya çıxır.
Mövzuya AnTuTu testlərini qatdıqda ilk olaraq performans cəhətdən elə texniki baxımdan da sürət aşırdılmış “Snapdragon 8 Gen 2 for Galaxy” çipsetinin, toplam yekunda sadə Snapdragon 8 Gen 2 çipsetinə sahib rəqiblərinin gerisində imiş kimi nəticə göstərir.
Ayrı-ayırılıqda Geekbench və 3D Mark testlərindən ilə müqayisədə həm CPU, həm GPU performansını nisbətən bütöv şəkildə gördüyümüz bu testdə nəticə biraz təəccübləndirir ki, siyahıya baxdıqda zirvədə olan OnePlus 11 modeli ilə Galaxy S23 Ultra arasında xeyli fərq müşahidə olunur. Şübhələndirən əsas detal Samsung şirkətinin Snapdragon 8 Gen 2 çipsetindən gözlədiyi performansı ala bilməyib, çipseti sürət aşırtmasıdır. Təbii ki, daha dəqiq nəticələr üçün gözləməli olacağıq. Lakin əgər belə bir hal səbəbi ilə sürət aşırtma edilmiş olarsa, müsbət vəziyyətdən fərqli olaraq sürət aşırdılmış çipset yüksək enerji sərfiyyatı kimi problemlərdən əziyyət çəkə bilər.
