Bildiyimiz kimi, texnologiya nəhəngləri son illərdə xüsusilə Android smartfonlarda RAM tərəfində çılğınlıq edərək yüksək həcmlərdən istifadə edirdi. Habele, bir çox texnologiya nəhəngi də smartfonlarını reklam edərkən bu RAM həcmini önə çıxarır və vurğulayırdı. İndi isə smartfon istehsalçıları inkişaf etdirdikləri cihazlarda yüksək RAM və yaddaş həcmini azaltmağa başlayıblar. Artıq smartfonlardakı yüksək RAM dövrü bitdi.
Beləliklə, android smartfon istehsalçıları öz cihazlarında RAM və daxili yaddaşın həcmini azaltmağa başlayıblar. 2023 RedMagic 8S Pro 24 GB RAM-a sahib ilk smartfon olsa da, OnePlus, Realme və Redmi kimi şirkətlər də oxşar həcmdə yaddaşa malik sərfəli modelləri təqdim ediblər. Bununla belə, bu ilki flaqmanlar, məsələn, Xiaomi 14 Ultra-nın ən yüksək səviyyəli versiyası, yalnız 16 GB RAM-a malikdir. Digital Chat Station smartfon bazarında mövcud vəziyyətlə bağlı maraqlı analitik hesabat dərc edib.
Digital Chat Station hesabatında bildirib ki, smartfon istehsalçılarının strategiyasındakı bu dəyişiklik ilk növbədə komponent xərclərinin artması ilə əlaqələndirilir. Belə ki, komponent istehsalçıları, o cümlədən Micron və Samsung bu ilin birinci rübündə DRAM modullarının qiymətlərini 15-20% artırıblar. Digər amil isə istehlakçı seçimlərinin dəyişməsidir. Oflayn rejimdə video və səs fayllarını yükləyərək izləmək mümkün olsa da, istifadəçilər əksər hallarda onları canlı şəkildə yəni internetdən izləməyi sevirlər. Həmçinin bir çox insan foto və videolarını saxlamaq üçün və ya yeni cihaza ötürmək üçün bulud xidmətlərindən istifadə edir. Bu isə öz növbəsində yüksək həcmli RAM-a olan ehtiyacı azaldır.
