Onsuz da çox pis dövrünü yaşayan Volkswagen indi yeni problemlər ilə qarşılaşır. Belə ki, Volkswagen şirkəti tarixinin ən böyük işçi tətilləri ilə üz-üzə qalıb. Volkswagen şirkətinin işçiləri 9 fabrikin fəaliyyətini dayandırmaqla etiraz etməyə başlayıblar.
Dünyanın ən böyük avtomobil şirkətlərindən biri olan “Volkswagen” son vaxtlar pis günlər yaşayır. Satışlar və qazanclar azaldıqdan sonra şirkət xərcləri azaltmaq üçün bəzi addımlar atır. Bununla belə, şirkətin planları arasında fabriklərin bağlanması və kütləvi ixtisarların olduğu barədə xəbərlər yayıldıqda 9 fabrikdə işlər dayandırılıb və işçilər etiraz aksiyasına başlayıb.
Beləliklə, bu gün Volkswagen daha bir zərbə alıb. Hətta iş o həddə çatıb ki, Almaniyada 9 fərqli Volkswagen fabriki işçiləri qısamüddətli tətilə başlayıblar. Əldə edilən məlumata görə, 14 min insanın çalışdığı Hannoverdəki fabrik və Volfsburqdakı qərargah da daxil olmaqla, bir çox bölgədə minlərlə insan toplaşaraq şirkəti tənqid edən nümayişlər keçirib. Təbii ki, bu vəziyyət istehsal tərəfində müxtəlif problemlər yaradıb. Volsfburqdakı əsas fabrikdə, hətta 2 saatlıq tətil, Golf də daxil olmaqla, yüzlərlə avtomobilin gecikməsi mənasına gəlir. Tətillər şirkətin Almaniyadakı fəaliyyətinin gələcəyi ilə bağlı işçilərlə rəhbərlik arasında mübahisə nəticəsində baş verib. Keçən həftə həmkarlar ittifaqı şirkətə 2025-2026-cı illər arasında bonuslardan imtina da daxil olmaqla 1,5 milyard avro qənaət etmək üçün tədbirlər təklif edib.
Lakin avtomobil istehsalçısı onları rədd edib. Bunun əvəzinə o, bazar payını saxlamaq üçün xərcləri azaltmalı və mənfəəti artırmalı olduğunu bildirərək maaşın 10% azaldılmasını tələb edib. Bu, həmkarlar ittifaqının və işçilərin qəzəbinə səbəb olub. Növbəti danışıqlarda razılıq əldə olunmasa, Volkswagen şirkətində baş verən bu etiraz aksiyalarının sayının artması gözlənilir.
