Sektorda dayanmadan çeşidlənən sürətli şarj texnologiyaları yayılmağa davam edir. Hər bir istehsalçının fərqli texnologiyalardan və fərqli şarj dəyərlərindən istifadəsi isə müxtəlif çətinliklər yaradır. İlk növbədə hər bir şarj cihazı ancaq bir marka və ya model üçün effektiv işləyir. 2 fərqli istehsalçıya aid smartfonun bənzər şarj dəyərlərində enerji yığsalar belə müəyyən problemlər müşahidə olunur. Məsələn, 2 fərqli 67 Vatt sürətli şarj dəstəkləyən smartfon bir-birinin adapteri ilə şarj olduqda həddindən artıq isinmə, nisbətən yavaş şarj olma kimi çətinliklərlə üzləşir. Nəticədə istifadəçilər də adapter alarkən necə seçim edəcəklərini bilmirlər. Ən vacib problemlərdən biri də universal olmayan adapterlərin ekoloji cəhətdən qeyri-effektiv olmasıdır. Ötən həftə Çinli texnologiya nəhənglərinin nümayəndələri vacib qərar vermək üçün bir yerə toplaşıblar. Belə ki, Xiaomi, Oppo, Huawei və Vivo kimi tanınmış smartfon istehsalçıları vahid bir şarj standartı tətbiq olunmasında razılığa gəliblər.
“Universal Fast Charging Specification” və ya “UFCS” adlı vahid şarj standartı cihazlara tətbiq edilməyə başlanacaq
Məlum məsələdir ki, Çinli şirkətlər 33 Vatt, 67 Vatt, 100 Vatt, 120 Vatt, 150 Vatt, 200 Vatt və.s kimi çeşidli şarj dəyərlərinə sahib cihazlar təqdim edirlər. Bu sahədə baş alıb gedən rəqabətin çox da məntiqli olmadığını görən smartfon istehsalçıları vahid standart üzərindən irəliləmək qərarı alıblar. Bu addım həm mühəndislik xərclərinə, həm istehsal xərclərinə, həm Avropa Birliyinin tələblərinə, həm də istifadəçilərin seçimlərinə və.s yaxşı təsir edəcək. Yeni smartfon modellərində görməyə başlayacağımız vahid şarj standartı ilk növbədə 45 Vatt və 65 Vatt olmaqla istifadəyə veriləcək.
Birinci mərhələdə aşağı şarj dəyərləri ilə prosesə starta verən Çinli şirkətlərin növbəti mərhələlərdə 100 Vatt, 150 Vatt kimi dəyərləri istifadəyə verməsi gözlənilir. UFCS standartı üzrə ilk smartfonlar isə Noyabr ayında OPPO tərəfindən təqdim edilməlidir. Ehtimallara görə OPPO Reno 9 seriyası smartfon modelləri 45 Vatt və 65 Vatt şarj standartı üzrə hazırlanmış ilk cihazlar olacaqlar.
2021-ci ildən üzərində şirkətlərin üzərində işlədiyi bu yenilik Avropa Birliyinin tətbiq edə biləcəyi qərarlar üçün də müdafiə rolunu oynayacaq. Vahid bir şarj standartı istifadəçilərin eyni adapterlərlə müxtəlif markalara aid cihazları batareyanı zədələmədən doldurmağa imkan verəcək. OPPO, Vivo, Xiaomi kimi şirkətlərin üzərində işlədiyi 150-250 Vatt aralığındakı sürətli şarj texnologiyaları isə ola bilsin 2 nəsil sonrakı smartfonlar üçün bundan sonra inkişaf etdirilməyəcək. Vahid şarj standartının hansı formada irəliləyəcəyini zaman göstərəcək.
