Çin uzunmüddətdir robotexnika sahəsində yenilik etməyə çalışır. Belə ki, illərdir süni intellektdən kvant hesablamalarına qədər ən qabaqcıl texnologiyalarda liderliyi ələ keçirmək arzusu ilə alışıb-yanan Çin indi insanabənzər robotlar istehsal etməyi düşünür. Qeyd edək ki, Elon Musk da vaxtaşırı Tesla şirkətinin insanabənzər robotu Optimus-un inkişafı ilə bağlı mühüm detalları bizlərə təqdim edir. Görünən odur ki, həm ABŞ, həm də Çin gələcəyi məhz bu robotlarda görür. Artıq gələn ildən ABŞ Boston Dynamics yeni insanabənzər robotlarını inkişaf etdirib istehsal etməyə hazırlaşır.
ABŞ-ın robotexnika sahəsindəki inkişafına görə də Çin rəqabətdən geri qalmamaq üçün yerli şirkətlər 2025-ci ilə qədər insanabənzər robotlar hazırlamaq barədə göstəriş verib. Həmçinin Çin insanabənzər robotların inkişafı ilə məşğul olacaq yerli şirkətlərə maliyyə dəstəyi də göstərəcək. Görünən odur ki, Çin ABŞ-ın bu sahədəki uğurundan ciddi şəkildə narahatdır. Bloomberg mənbəsinə görə, Çin rəsmiləri robototexnika və əlaqəli sənayelərdə ixtisaslaşmış gənc Çin şirkətlərinə maliyyə dəstəyi verməyi hədəfləyir. Hətta Çin Sənaye və İnformasiya Texnologiyaları Nazirliyinin məlumatına görə, hökumət yaxın iki il ərzində Çin şirkətlərinin sensor texnologiyası, hərəkətə nəzarət və insan-maşın qarşılıqlı əlaqəsi sahəsində irəliləyişlər edəcəyini gözləyir.
Beləliklə ilkin mərhələdə 2025-ci ilə qədər Çində sadə insanabənzər robotlar hazırlanacaq. Məhz bu məqsədə çatdıqdan sonra isə növbəti hədəf 2027-ci ilə qədər öyrənə, məntiqi nəticə çıxara və təkamül edə bilən yerli insanabənzər robotlar hazırlanması olacaq. Qeyd edək ki, 3 il əvvəl Cənubi Koreyanın Hyundai Motor şirkəti 1,1 milyard dollar ödəməklə ən qabaqcıl insanabənzər robotlar hazırlayan ABŞ şirkəti Boston Dynamics-ə nəzarəti ələ keçirdi. Ona görə də Çin rəsmiləri ölkənin bu sahədə geosiyasi rəqiblərindən geri qalmasını istəmirlər.
