Bildiyimiz kimi, Elon Musk ötən aylarda süni intellekt tədqiqatları üçün xAI adlı şirkət qurmuşdu. Bu şirkət qurulduğu andan bəri məhz süni intellekt texnologiyaları üzərində çalışır. Hətta xAI şirkətinin ilk məhsulu da məhz ChatGPT rəqibi Grok olacaq. Qeyd edək ki, milyarder Elon Musk da xAI şirkətinin ChatGPT rəqibi Grok ilə yaxından maraqlanır və onunla bağlı məlumatları paylaşır. Ümumiyyətlə ABŞ-ın Nevada ştatında qurulan xAI şirkəti ilk mərhələdə məhsuldar süni intellekt mövzusunda genişmiqyaslı araşdırma etmişdi. Daha sonra isə şirkət hazırda üzərində çalışdığı Grok adlı layihəyə start vermişdi.
Qeyd edək ki, Elon Musk tərəfindən əsası qoyulan süni intellekt şirkətinin əsas məqsədi kainatın əsl mahiyyətini anlamaqdır. Həmçinin şirkətin bütün komandasını məhz Elon Musk özü idarə edir. Maraqlısı budur ki, şirkətin komandasını DeepMind, OpenAI, Google Research, Microsoft Research, Tesla kimi şirkətlərdə təcrübəsi olan əməkdaşlar təşkil edir. Bu komanda hazırda Adam Optimizer, Batch Normalization, Layer Normalization və Adversarial nümunələrinin kəşfinə töhvə verib.
Bu gün Elon Musk ChatGPT rəqibi Grok ilə bağlı paylaşım edib. Paylaşımda yeni çatbotun maraqlı xüsusiyyətləri də məlum olub. Belə ki, Grok real vaxtda internetə çıxış təmin edərək istifdaçilərin bütün sorğularını cavablandıracaq. Həmçinin Elon bildirir ki, süni intellekt əsaslı çatbot bir çox zarafat və sarkastik cavablardan da istifadə edir. Görünən odur ki, Elon süni intellekt çatbotunu da özünə bənzətməyə çalışır.
