Bu yaxınlarda bir çoxlarınızın xatırladığı qədərilə yerli startaplarımızdan birinin 100 min dollar investisiya aldığı ilə bağlı xəbər dərc etmişdik. Əgər startap ekosistemindən xəbərdarsınızsa, söhbətin Voiceloft startapından getdiyini artıq bilirsiniz. Belə ki, davam edən 500 Global çərçivəsində PAŞA Bankın keçmiş əməkdaşı olan Zeynal Kərimzadə tərəfindən yaradılan “Epoint” startapı da möhtəşəm nailiyyət əldə etməyi bacarıb. “Epoint” startapı 500 Global Akselerasiya proqramından 100 min dollar investisiya alıb. Epoint.az startapı ən sadə formada bankdan asılı olmayaraq, istənilən bankın biznes kartını əlavə edib, vəsaitləri qəbul etməyə yarayır. Epoint platforması ilə istifadəçilər (fərd, şirkət) məhsullarını və xidmətlərini onlayn təqdim edərək, ödənişləri onlayn qaydada qəbul edə bilər. Platformanın ümumi dövriyyəsi 17 milyondan çox olub, Azərbaycanda biznes müştəri sayı 300-dən çoxdur.
Yaxşı bəs, startap necə ortaya çıxdı deyə sizlərdə sual yarana bilər. Elə Zeynal Kərimzadənin verdiyi müsahibə nitqindən götürülmüş detallara əsasən, Epoint startapının necə yarandığına nəzər salaq. Zeynal Kərimzadə qeyd edir ki, bu layihə barədə fikir onda artıq 7-8 il əvvəldən formalaşıb. Üstdə də bəhs etdiyimiz kimi əvvəllər bu PAŞA Bankda işləyən Zeynal Kərimzadə 2 il əvvəl oradakı 10 illik karyerasını sonlandırıb öz ideyasının arxasıyca getməyə qərar verir.
İdeyanın üzərinə getməklə startapı yaratmaqda isə geridə bir çox çətinliklər var idi. Çünki, evli olan Zeynal bəy eyni zamanda işindən ayrıldığı dövrdə ailə məsuliyyətini də öz üzərində daşıyırdı. Lakin bütün bunlara baxmayaraq ətraf mühitin bir növ ağılsızlıq yanaşmasına baş qoşmayaraq, bu gün möhtəşəm bir yerli startap olan Epoint.az platformasını təsis etdi.
İlk olaraq startapı qurduqda çox çətinliklər yaranmışdı. Biznesə yeni başlayanda tək olduğundan işə götürdüyü proqramçılar xaric texniki, marketinq, əməliyyatların görülməsi tərəfini özü idarə edirdi. Eyni zamanda əməkdaşlıq üçün də banklara getdikdə startapın potensialını görsələr belə işləməkdə tərəddüd edirdilər. Lakin Zeynal Kərimzadənin özünün də vurğuladığı kimi startap qurularkən təsisçisin əvvəlki iş təcrübəsinin yaxşı olmasının vacibliyinin altından xətt çəkir. Əgər hər bir fərqli işi görən həm-təsisçilər yoxdursa tək bir təsisçi kimi görüləcək işlər çox ağır və təcrübə tələb edən olur. Zeynal bəyin də üstün tərəfi uğurlu karyerası ilə ekosistemdə yaxşı əlaqələr toplamış olması və dəyər yaratması idi.
Sözlərinə görə, bəzən yaxşı əlaqələr hesabına layihəniz də atdığınız “kiçik bir addım və təkmilləşmə bəzən sizin üçün böyük məbləğdən daha böyük ola bilər”. Ona görə vacib olan tək şey pul deyil. Netvörkinqiniz həqiqətən güclü olmalıdır.
Startapın inkişafında isə ən yaxşı təkan verən hadisələrdən biri Take Off Baku sammitində əldə edilmiş uğur oldu. Sadəcə qeydiyyatın sonlanmasına son 2 gün qalmış qatılan Epoint.az platforması ölkəmizdə baş tutan Teknofest tədbirinin fonunda qalib gəlməyi bacararaq ikinci yeri tutdu. Azərbaycanlılar tərəfindən qurulan və elə Azərbaycanda olan bir startap kimi ilk üçlükdə Epoint.az fərqləndi. Qlobal bir mükafatlandırmadakı uğurunun ardıyca isə Ukrayna, Gürcüstan, Rusiyadan müştərilər təkliflərə başladılar.
Yaxşı bəs, Epoint.az platforması tam olaraq nədir?
Bu platforma kiçik və orta sahibkarlar üçün elektron ticarətə tez bir zamanda qoşulma imkanıdır. Məsələn, hansısa mal və ya xidmət satışı ilə məşğulsunuzsa hansısa banka müraciət etməlisiniz. Bu isə olduqca vaxt alan bir prosesdir. Epoint isə bunu maksimum dərəcədə tezləşdirir. Zeynal bəyin fikrincə, xaricdə bu layihə daha tez uğur qazanıb, daha yüksək dövriyyələr əldə edə bilərdi. Lakin əsas məqsəd belə bir platformanı Azərbaycanda qurmağı bacarmaq idi.
Belə ki, sahibkar onlayn formada platforma üzərindən qeydiyyatdan keçir. Bu isə ona dərhal elektron ticarət ilə məşğul olmaq imkanı yaradır. Onun üçün xüsusi bir “sayt” yaranır və oradan onlayn satışlarını edə bilə, həmçinin ən əsası kartlarla ödənişləri qəbul edə bilər. Həm xarici ölkələrdən, həm Azərbaycan kartlarından ödənişlər asanlıqla alınır. Bu xidməti əldə etmək üçün sahibkar banka müraciət etsə ortalam 20 gün vaxt tələb olunur. 3 dəqiqə ilə 20 gün arasındakı fərq isə çöx böyükdür. Bir növ bu xidmət elə bankların özü üçün də özlərinə rəqib kimi görünsə də, əslində Epoint.az bir növ körpü rolunu oynadığından Zeynal Kərimzadə tam tərsi banklarla əməkdaşlıq etməli olduqlarını bildirir.
Sadə dildə izah etsək, Epoint.az vaxtı bu qədər qısaltmağı banklarla B2B inteqrasiya ilə bacarır. Normalda bir müştəri banka müraciət etdikdə bəndlərin mərhələ-mərhələ tamamlanması günlər çəkirsə, Epoint.az platforması artıq banka qoşulmuş bir xidmət kimi hazır dayanır. Müştəri isə hazır platforma üzərindən 3 dəqiqəyə elektron ticarət imkanını əldə etməyi bacarır. Yəni, bankın işini sanki Epoint.az platforması görmüş olur.
Nəticə olaraq hal-hazırda Epoint.az platforması Azərbaycanda 10, Ukraynada 4 nəfər işçi ilə fəaliyyət göstərir. Zeynal Kərimzadə bildirir ki, alınan investisiya ilə yeni bir bazara açılmağı, komandaya təcrübəli yeni kadrların gətirilməsinə, platformanın təkmilləşdirilməsinə və.s yönləndiriləcək. Eyni zamanda startapın platforma daxilində yeni texnoloji həllər təqdim etməsi də Zeynal Kərimzadənin bildirdiyinə əsasən, baş tuta bilər.
