Cənubi koreyalı texnologiya nəhəngi müəyyən dövr ərzində insanların yuxu rejimi ilə bağlı araşdırma aparırdı. İndi isə dünyanın texnologiya nəhənglərindən biri olan Samsung yuxu ilə bağlı apardığı ətraflı araşdırmasının nəticələrini paylaşıb. Ümumiyyətlə Samsung bildirir ki, “Müasir dünyada inkişaf edən texnologiyanın gətirdiyi rahatlıqlardan əlavə sürətli temp, stress və daim əlaqədə olmaq ehtiyacı, bir çox insanın yuxu rejiminə və yuxu keyfiyyətinə mənfi təsir göstərir. Şəhər həyatı, artan ekran istifadəsi, artan sosial şəbəkə istifadəsi və gərgin iş rejimi insanların yuxu rejiminə birbaşa təsir edir. Bütün bu amillərin təsiri ilə sağlam yuxu vərdişlərinə sahib olmaq müasir həyatın ən vacib elementlərindən birinə çevrilmişdir”.
Hazırda sağlam olmaq üçün yuxuya önəm verən insanları sayı artmaqdadır. Hətta yuxuya artan marağı Samsung Health proqramında müşahidə olunan tendensiyalar sübut edir. Samsung Health tətbiqinin əldə etdiyi məlumatlara görə, bir il ərzində ən azı həftədə bir dəfə yuxunu aktiv şəkildə izləyən istifadəçilərin sayı 182% artıb. Ümumiyyətlə insanlar yuxu rejimini idarə edə bilirmi və ya yaxşı yata bilirmi? Bu suala cavab vermək üçün Samsung indiyə qədər yuxu sağlamlığı ilə bağlı ən böyük araşdırmalardan birini həyata keçirdi. Tədqiqatçılar dünya üzrə Samsung Health istifadəçilərinin 716 milyon gecə yuxu davranışını təhlil edib. Şəxsi yuxu sağlamlığına maraq sürətlə artsa da, həqiqət budur ki, insanların gecələr yuxu keyfiyyəti əslində azalır.
Samsung şirkətinin yuxu araşdırmasının nəticələrinə uyğun olaraq deyə bilərik ki, dünya üzrə orta yuxu müddəti 7 saat 3 dəqiqədən 6 saat 59 dəqiqəyə qədər azalaraq National Sleep Foundation tərəfindən tövsiyə olunan 7 saatlıq yuxu göstəricisindən də aşağı düşüb. Narahat edici digər bir məsələ yuxu prosesində yataqda oyaq qalma müddətinin artmasıdır ki, bu da yuxu səmərəliliyinin azalmasına səbəb olur. Araşdırmalar göstərir ki, insanlar yataqda uzun müddət keçirsə də, çox az yatırlar. Bu isə sosila şəbəkələrdən çox istifadə olunması ilə qaynaqlanır. Qeyd edək ki, Yuxusuzluq ən çox gənclər arasında rast gəlinir. 20 yaşlarında olan insanlar 70 yaşlarında olanlarla müqayisədə yuxusuzluqdan iki dəfə çox əziyyət çəkirlər. Bu göstərici gənclərdə 49 dəqiqə, yaşlılarda isə 29 dəqiqə olaraq ölçülür.
Bölgələrə nəzər saldıqda, ən qısa mürgüləmə müddəti 41 dəqiqə ilə Asiya, ən uzun mürgüləmə müddəti isə 47 dəqiqə ilə Latın Amerikasındadır. Dünyada insanlar həftə sonları orta hesabla 44 dəqiqə daha çox yatırlar. Görünən odur ki, dünyadakı bütün insanlar eyni yuxu problemindən əziyyət çəkir. Təbii kİ, bunun səbəbləri texnologiyanın mükəmməl inkişafı, sosial şəbəkələrə olan marağın çoxalması və sairə hesab olunur. Lakin yenə də nəzərə almaq lazımdır ki, sağlamlıq məhz səmərəli yuxudan başlayır.
