Ötən aylarda Braziliyanın şarj cihazı olmayan iPhone modellərinin satışını dayandırdığını xəbər vermişdik. İndi isə Braziliya ölkədə şarj cihazı olmadann satılan bütün iPhone modellərini müsadirə edib. Qeyd edək ki, Apple şirkəti artıq 2 ildir ki smartfonlarını şarj cihazı olmadan təklif edir. Belə ki, ABŞ texnologiya nəhəngi ilk dəfə iPhone 12 smartfonunu şarj cihazı olmadan satışa çıxarmışdı. Dünyanın bir çox ölkəsi bu qərarla bağlı narazılıqlar etsə də mövzu ilə bağlı ən ciddi addımları Braziliya hökuməti atmışdı.
Qeyd edək ki, Braziliya məhkəməsi 2 ay əvvəl Apple şirkətini şarj cihazı olmadan smartfon satdığı üçün 2.38 milyon dollar cərimə etmişdi. Bu qərardan sonra isə hökumət ölkədəki Apple mağazalarında reyd keçirib. Nəticədə isə şirkətin hökumətin cəzalarına heç bir məhəl qoymadığı ortaya çıxıb. Bundan sonra isə Braziliya məhkəməsi şirkəti əlavə olaraq 19 milyon dollar cərimə edib və ölkədə şarj cihazı olmadan satılan bütün iPhone modellərini müsadirə edib. Qeyd edək ki, hökumətin iPhone 11, iPhone 12, iPhone 13 və iPhone 14 seriyasını müsadirə etdiyi bildirilir.
Apple şirkəti Braziliya məhkəməsinin verdiyi qərarlara hüquqi olaraq etiraz edib. Şirkət bildirib ki, onun mövcud vəziyyətlə bağlı qərar qəbul olanadək ölkədə satışa davam etmək hüququ var. Həmçinin şirkət bütün müsadirələrə baxmayaraq smartfon satışına davam edəcəyini açıqlayıb. Şirkətin yekun qərara qədər iPhone satışlarına davam etməsinə icazə verən hakim Dieqo Camara Alves verdiyi açıqlamalarda, hökumətin verdiyi qərarın hüquqi cəhətdən yanlış olduğunu bildirib. Həmçinin braziliyalı hakim gələcəkdə şirkətin məhkəmədə qalib gələcəyini düşünür.
