Adapteri qutudan çıxaran Apple şirkətinin bu yolda atdığı addımların əsası ekoloji çirklənmə olaraq dəyərləndirilir. Hətta Apple tərəfindən atılan bu addımı bəyənən digər istehsalçılar da qutudan adapter başlıqlarını yığışdırırlar. Əslində bu addım özlüyündə qiymətə xeyli yaxşı təsir edəcək addım hesab edilir. Çünki, ilk növbədə daşınma xərcləri daha kiçik qutu səbəbi ilə azalır. Eyni zamanda smartfonun qiyməti ucuzlaşmasa belə adapter olmadığı üçün bahalaşmadan stabil saxlanıla bilir. Məsələn, elə iPhone 13 seriyasında qiymətlərin ötən illərlə müqayisədə rəqiblər nəzərən sabit qala bilməsində adapterin qutudan çıxarılması yaxşı təsir göstərmişdir. Lakin ictimaiyyətə Apple şirkəti bu addımı ekoloji tarazlığın qorunması deyə təqdim etdikdə yanaşma birmənalı olmur. Elə Braziliya məhkəməsi tərəfindən verilən qərarda da ekoloji təmiz arqumenti və adapter başlıqları arasındakı əlaqə bəzi problemlər yaradıb.
Braziliya hökuməti satışları dayandırmaqla qalmayıb 2.38 milyon dollar cərimə də təyin edib
Belə ki, Braziliya Ədliyyə Nazirliyi iPhone 12 və daha yeni modellərin, bir sözlə qutusunda adapter olmayan bütün iPhone modellərinin satışının dayandırılmasını əmr edib. Məhkəmə prosesi zamanı karbon emissiyalarını azaltmaq tipli arqumentlərinin hər biri rədd edilərək, adapter olmadan smartfon satışı həyata keçirilməsinin ekoloji olaraq təmiz olduğunu təsdiqləyən heç bir sübut olmadığı bildirilib. Apple şirkəti Braziliyada istehlakçıların hüquqlarının müdafiəsi agentliyi ilə apardığı müzakirədə verilmiş qərara etiraz edəcəklərini qeyd edib.
Braziliya hökuməti bu qərarı istehsalçının alıcılara əksik məhsul təklif etdiyi iddialarından sonra verib. Apple şirkəti isə qutuda adapter olmamasının əksik məhsul kimi qiymətləndirilməsi fikri ilə razı deyil. Apple şirkətinin iPhone 14 seriyasının təqdim edilməsinə 1 gün qalmış Braziliya hökumətinin adapter ilə bağlı verdiyi bu qərar maraqla qarşılanıb.
Bu gün, Bakı vaxtı ilə saat 21:00-dan etibarən Apple bir neçə yeni məhsulunun təqdimatını həyata keçirəcək.
