Kiber texnologiya sənayesinin aparıcı qruplarından biri olan Çin Kiber Assosiasiyası (CSAC) ölkədə satılan Intel məhsullarının təhlükəsizlik qaydalarını pozduğunu iddia edir. Belə ki, Çin ABŞ mərkəzli Intel şirkətinin kəşfiyyat məqsədi ilə istifadə olunduğunu, bu məqsədlə yoxlanılmasını istəyir. CSAC-ın Çində WhatsApp-ın ekvivalenti kimi istifadə edilən WeChat platformasındakı hesabından verdiyi açıqlamada Amerika şirkətinin çiplərinin ölkənin təhlükəsizliyinə və maraqlarına mənfi təsir göstərə biləcəyi iddia edilir.
Pekin administrasiyasına yaxın olan CSAC iddia edir ki, ABŞ kəşfiyyat agentliyi Milli Təhlükəsizlik Agentliyi (NSA) Intel çiplərinə daxil olmaq üçün “arxa qapı” və ya “backdoor” yerləşdirib. Backdoor kompüter sistemlərinin normal təhlükəsizliyini neytrallaşdırır, cihazları icazəsiz giriş və kiberhücumlara qarşı həssas edir. CSAC iddia edir ki, bu “arxa qapı” sistemləri Çində süni intellekt tədqiqatlarında istifadə edilən Intel Xenon çiplərində də var. Şirkətin bəyanatına görə, “Bu vəziyyət dünyanın bir çox ölkələrinin, o cümlədən Çinin kritik informasiya infrastrukturu üçün böyük təhlükəsizlik təhlükəsi yaradır. Intel məhsullarının istifadəsi milli təhlükəsizlik üçün ciddi risk yaradır.”
Digər tərəfdən, Intel, Çin Kommunist Partiyasına aid olan Global Times qəzetinə göndərdiyi açıqlamada iddiaları rədd edərək, məhsullarının qanun və qaydalara uyğun olduğunu müdafiə edib. Intel verdiyi açıqlamada bildirib ki, “Biz narahatlıqları aradan qaldırmaq və məhsulun təhlükəsizliyi və keyfiyyətinə sadiqliyimizi təsdiqləmək üçün müvafiq orqanlarla əlaqə saxlayacağıq”. Texnologiya sektorunu təhlil edən Liu Dingding, Çin rəhbərliyinin Intel çiplərini yoxlamaq variantını nəzərdən keçirməsi lazım olduğunu ifadə edərək, “Kiber təhlükəsizlik milli təhlükəsizliyin çox vacib bir hissəsidir” deyə açıqlama verib.
