Çin bu dəfə də texnologiya dünyasında bir addım irəlidədir. Belə ki, Çin gələcəkdəki 6G şəbəkələri üçün optik rabitə texnologiyasını artıq kosmosda sınaqdan keçirir. Qeyd edək ki, bu avadanlıq bu ilin avqust ayında orbitə çıxarılmışdı. İndi isə yeni rabitəni sınaqdan keçirmək üçün istifadə olunur. Peykdə quraşdırılan qurğu işıq siqnallarını elektrik impulslarına çevirmədən ötürə bilir. Hətta Çin Elmlər Akademiyasının Xi’an Optika və Dəqiq Mexanika İnstitutundan bir qrup kosmos sınağının uğurlu olduğunu bildirib.
Ümumiyyətlə adi rabitə cihazları məlumat ötürülməsi zamanı işıq siqnallarını elektrik siqnallarına çevirir. Lakin yeni texnologiya ilə işıq siqnallarını elektrik impulslarına çevirmədən ötürə bilir. Məhz bu üsul elektron darboğaz effektinə malik olsa da, məlumat kommunikasiya sistemlərinin sürətini və tutumunu maksimum dərəcədə artıra bilər. Yeni üsul həmçinin xüsusi rabitə vasitələrinin tikintisi üçün çəkilən xərcləri azalda bilər. Maraqlısı budur ki, Çin alimlərindən ibarət qrup on ildən çox vaxtını məlumat ötürmə qabiliyyətini, çevikliyini və sürətini artıran bu cihazın yaradılmasına həsr edib. Tərtibatçılar bildirir ki, “6G də daxil olmaqla, yeni nəsil rabitə şəbəkələri yerüstü rabitədən kənara çıxacaq, peyk qovşaqlarını da əhatə edən qlobal şəbəkə olmalıdır”.
Çin tərəfindən 6G optik peyk rabitə texnologiyası ilə bağlı kosmosda aparılan sınaqlar nəticəsində məlum olub ki, yeni texnologiya hazırda saniyədə 40 GBit məlumat ötürmə sürətini dəstəkləyir. Qeyd edək ki, peyk-yer rabitəsi əsasən radiosiqnalların istifadəsinə əsaslanır, lakin istifadə olunan tezliklərin məhdud olması səbəbindən məlumatların ötürülmə sürəti nisbətən aşağıdır. Buna görə də, optik məlumat mübadiləsi texnologiyaları, xüsusilə lazerlər, son vaxtlar diqqət cəlb edir. Bəzən isə lazerlər belə məlumatların yüksək sürətlə ötürülməsini məhdudlaşdırır. Məhz bu səbəblərdən yeni texnologiya üzərində sınaqlar həyata keçirilir. Görünən odur ki, hələ yeni-yeni 5G bağlantısına alışan dünya, yaxın gələcəkdə 6G ilə də tanış olacaq.
