Analitiklər Çin istehsalçıları üçün parlaq gələcək görmürlər. Belə ki, Çinli elektromobil istehsalçıları daxili bazarda endirim müharibələri, xaricdə tətbiq edilən yüksək tariflər və tədarükün artması ilə artan rəqabət kimi problemlərlə üzləşirlər. Mütəxəssislərin fikrincə, xarici maliyyə dəstəyi olmadan fəaliyyətini davam etdirə bilən şirkətlər, bu çətin şəraitdə ayaqda qala biləcəklər. Digərləri isə sənayedən çıxmalı olacaq.
Çinin yüksək səviyyəli elektrik avtomobil istehsalçıları Nio, Xpeng, Geely-nin Zeekr və Stellantis tərəfindən dəstəklənən Leapmotor kimi şirkətlər artan itkilərini dayandırmaq və rəqabətə davam etmək üçün yeni modellər təqdim edir və xərcləri azaltmaq üçün tədbirlər görür. Ancaq yalnız BYD, Li Auto və Huawei tərəfindən dəstəklənən Aito kimi böyük oyunçular əksinə gün keçdikcə daha çox gəlir əldə edirlər. Analitiklərin fikrincə, bazar doyma nöqtəsinə çatdıqca və yüksək tariflər səbəbindən xaricə satışlar yavaşladıqca, şirkətlər xərclərə nəzarətdə daha səmərəli olmalıdırlar.
Goldman Sachs-ın məlumatına görə, 2023-cü ilin sonuna qədər Çində elektromobil fabriklərinin illik istehsal gücü 17 milyon ədədə çatdı, lakin obyektlərin yalnız 54 faizi tam gücü ilə işləyirdi. Bu gücün 2024-cü ildə 20,2 milyon ədədə yüksələcəyi gözlənilsə də, Çin Avtomobil İstehsalçıları Assosiasiyası bu il cəmi 11 milyon ədəd avtomobilin təhvil veriləcəyini təxmin edir. Bu o deməkdir ki, istehsal gücünün yalnız yarısından istifadə etmək mümkün olacaq. Heç bir biznes, iqtisadiyyat və ya sənaye potensialının yarısını istifadə etmək istəməz və bunu davam etdirməz. Xpeng CEO-su He Xiaopeng, sənayedə fəaliyyət göstərən təxminən 50 istehsalçıdan yalnız səkkizinin 2027-ci ilə qədər sağ qala biləcəyini proqnozlaşdırır. Onun sözlərinə görə, “Kiçik istehsalçılar bu sürətlə inkişaf edən sənayedə şiddətli rəqabətə tab gətirə bilməyəcəklər.” Beləliklə, əksər Çinli elektromobil istehsalçıları artan rəqabət şəraitində iflas edəcəklər.
