Ötən həftə Android ekosisteminin ən güclü və ən mükəmməl çipsetlərindən biri olan Snapdragon 8+ Gen 1 çipseti maraqlı bir testdən keçirilib. Belə ki, tanınmış TechDroider ləqəbli tanınmış bloqer Samsung ekosisteminin 3 ən güclü cihazını yanaşı gətirib. Həmin cihazlar isə təxmin etdiyiniz kimi Samsung Galaxy S22 Ultra, Galaxy Z Fold 4 və Galaxy Z Flip 4 modelləridir. Samsung şirkəti hər il olduğu kimi Galaxy Z seriyasını öz istehsalı olan Exynos çipsetləri ilə təchiz etməyərək, “premium” deyə hesab etdiyi bu modellərə bazarda lider olan Snapdragon 8+ Gen 1 çipsetini quraşdırıb. Nəticədə aparılan testlər çox qəribə bir problemi ortaya çıxarır. Snapdragon 8+ Gen 1 enerji sərfiyyatı ilə o qədər yaxşı nəticə göstərir ki, Galaxy S22 Ultra modeli heç Snapdragon 8 Gen 1 çipseti ilə də digər 2 modelə yaxınlaşa bilmir.
Samsung şirkətinin Exynos 2200 çipseti istər performans, istər enerji sərfiyyatı cəhətdən Android ekosistemindəki flaqman rəqiblərindən müəyyən qədər geri qalır. Oyun və yüksək stress altında edilən testlər Exynos 2200 çipsetinin performans davamlılığının aşağı olduğunu göstərir. Normal istifadəçi bunu çox da hiss etmir. Çünki, performans davamlılığı aktiv olaraq oyunlarda müşahidə edilə biləcək mövzudur. Lakin iş enerji sərfiyyatına gəldikdə problemin miqyası böyüyür. Exynos 2200 çipsetinin timsalında Snapdragon 8 Gen 1 çipseti də Samsung şirkətinin 4nm texnoloji prosesinin əziyyətini çəkir. Performansının nisbətən stabil olmasına baxmayaraq enerji sərfiyyatı yenə də əhəmiyyətli dərəcədə yüksəkdir.
Snapdragon 8+ Gen 1 çipseti daha kiçik batareya və böyük ekranla daha çox ekran müddəti verir
Snapdragon 8 Gen 1 çipsetindən Snapdragon 8+ Gen 1 çipsetinə keçid etdikdə isə TSMC əsaslı 4nm istehsal prosesi, enerji sərfiyyatı cəhətdən ciddi fərq yaradır. Fərq o həddə çatıb ki, Samsung şirkətinin 4nm texnoloji prosesində yaranan problem dolayı olaraq özlərinə təsir edib. TechDroider tərəfindən aparılan testlər aşağıdakı nəticələri ortaya qoyur:
Galaxy Z Fold 4 modeli Snapdragon 8+ Gen 1 (TSMC 4nm) çipsetinə və 4400 mAs batareyaya sahibdir. 7.6 düymlük qatlana bilən böyük ekranı açıq olduqda 9 saat 18 dəqiqə işləməyi bacarır. Ortalama temperaturu isə 39.7°C təşkil edir.
Galaxy Z Flip 4 modelində isə Snapdragon 8+ Gen 1 (TSMC 4nm) çipseti və daha kiçik 3700 mAs batareya mövcuddur. 6.7 düymlük qatlana bilən ekranı ilə bu model 9 saat 4 dəqiqə ekran müddəti verir. Ortalama temperaturu isə 42°C dərəcə göstərilir.
Galaxy S22 Ultra modeli Snapdragon 8 Gen 1 (Samsung 4nm) çipsetinə və 5000 mAs batareyaya malikdir. 6.8 düymlük ekranı ilə testin sonunda 8 saat 56 dəqiqə ekran müddəti verən bu modelin temperaturu 50.4°C olaraq qeydə alınır.
Digər modellərin müqayisəsinə özünüz aşağıdakı videodan daha detallı baxa bilərsiniz. Göründüyü kimi, performansı kənara qoysaq çipsetlər arasındakı müxtəliflik smartfonun enerjisinin tez bitməsinə də ciddi təsir göstərir. Bəziləri bu mövzuya performans mənə önəmli deyil kimi yanaşır. Lakin əslində, enerji sərfiyyatının da çipsetlərə görə xeyli fərqli olduğunu nəzərə almalısınız. Galaxy Z Flip 4 kiçik batareyaya, Galaxy Z Fold 4 isə daha böyük ekrana sahibdir, lakin daha az enerji sərf edən çipsetləri hesabına bu cihazlar testlərdə önə çıxırlar.
Snapdragon 8 Gen 1 yerinə testlərə Exynos 2200 çipsetini işlədən Galaxy S22 Ultra testə əlavə edilsə vəziyyətin necə olacağını həqiqətən maraqlıdır. Lakin böyük bir ehtimalla ekran müddəti daha da aşağı düşəcək. Diqqət çəkən digər bir nünas isə Snapdragon 8+ Gen 1 çipsetinin enerji sərfiyyatı ilə bərabər termal vəziyyətinin də xeyli yaxşı olmasıdır. Galaxy Z seriyası modelləri az isinir, amma Galaxy S22 Ultra modelinin 50°C üzəri isinməsi böyük bir ehtimalla yenə Snapdragon 8 Gen 1 çipsetində olan “Samsung Semiconductor” əsaslı istehsal prosesindən qaynaqlanır.
Nəticədə Android ekosistemindən flaqman smartfon almaq istəyən alıcının seçimi bu və bənzəri səbəblərə görə xeyli çətinləşir. Mövzu barədə siz nə düşünürsünüz? Fikirlərinizi rəylərdə bizimlə bölüşə bilərsiniz.
