Saf Android cihazların əsas üstünlüyü, Android əməliyyat sistemi üzərinə istehsalçı tərəfindən heç bir interfeysin yüklənməməsidir. Belə smartfonlar adətən, yalnız Android əməliyyat sisteminin gətirdiyi hazır tətbiqləri və çox az sayda istehsalçı tətbiqlərini əldə edirlər. Beləliklə, daha sürətli və daha stabil performans vermə potensialına sahib bu modellər Google şirkətinin də dəstəyi ilə uzun müddət yeniləmə ala bilirlər. Lakin reallıqda bu cihazlar, xüsusilə də Xiaomi modelləri Android One proqramı əsasında bir çox problemlərlə qarşılaşmışdı. Saf Android-in sahib olduğu darıxdırıcı istifadəçi təcrübəsi ilə də birlikdə elə Xiaomi şirkəti saf Android təcrübəsindən uzaqlaşmaq qərarı aldı. İddialara görə, Xiaomi yenidən saf Android markasını bərpa etmək istəyir.
Xiaomi Mi A seriyası saf Android kimi geri qayıdır?
The Mobile Indian resursu bu mövzu ilə bağlı yeni məlumat paylaşıb. Belə ki, Xiaomi şirkətinin orta seqment üçün saf Android əməliyyat sisteminə sahib yeni brend və ya marka hazırladığı iddia edilir. Hətta biraz da irəli gedən mənbənin bildirdiyinə görə 2 fərqli smartfon hal-hazırda inkişaf mərhələsindədir. Bu cihazlardan birinin Snapdragon 778G çipseti, digərinin isə Snapdragon 765 çipseti üzərinə hazırlandığı deyilir.
İddiaların bizə görə şübhəli hissəsi isə burda başlayır. Çünki, yanılmırıqsa Snapdragon 765 çipsetinin hal-hazırda seriya istehsalı mövcud deyil. Böyük bir ehtimalla, həmin cihaz ya məhdud sayda olmaqla Hindistan bazarını əhatə edəcək, ya da test variantı ola bilər. Mənbə eyni zamanda cihazların hədəflənən qiymət aralığını da bizlərlə bölüşür. Smartfonlar təqribi olaraq 190-310 dollar qiymət arasında təklif edilə bilər.
Hələ ki, xəbəri təsdiqləyən hansısa bir sertifikat və ya model nömrəsi sızdırılmayıb. Yeni cihazların Redmi, yoxsa POCO brendlərinə aid olacağı dəqiq bilinmir. Qüvvətli ehtimal POCO brendi daxilində modellərin debüt etməsindən yanadır. Lakin yeni bir brend yaradıla və ya Mi A seriyası bərpa edilə bilər. İnsayderlərin fikrincə də Xiaomi həqiqətən belə bir addım ataraq MIUI interfeysini sevməyən alıcıları, saf Android ilə yenidən özünə çəkmək istəyir. Təqribi 4 ilə qədər yeniləmə dəstəyi və Android 13 əməliyyat sisteminin geniş imkanları ilə Xiaomi firması belə bir modeldən doğurdan da yüksək satış ədədləri əldə edə bilər.
