2018-ci ilin yazında Xiaomi baş icraçı direktoru olan Lei Jun çöx böyük bir vəd vermişdi. Belə ki, Lei Jun-un sözlərinə görə Xiaomi firması hər satdığı smartfon və ya digər texnoloji avadanlıqlardan heç cür 5%-dən artıq mənfəət almayacaqdı. Hətta bu sözlərdən sonra Lei Jun 2019-cu ildə səhnəyə çıxaraq Xiaomi firmasının smartfonlarının sadəcə 5%-lik bir mənfəətlə satıldığını yenidən təkrarlamışdı. Lakin daha sonra elə Mi 10 seriyasından başlayaraq firmanın strategiya dəyişikliyi Lei Jun-un vurğulayaraq dediyi bütün sözlərin üstündən xətt çəkdi. Xatırlayırsınızsa Mi 10 Pro və Mi 10 Ultra modelləri premium üst seqment cihazlar kimi xeyli baha qiymətə satışa çıxarılmışdı. Beləliklə son 3 ildir tam fərqli strategiya ilə davam edən şirkət ötən həftə Xiaomi 12S Ultra modelini təqdim etdi. Counterpoint isə Xiaomi firmasının bu modeldən nə qədər xeyir qazandığını ortaya qoyan yeni bir məlumat yayımlayıb.
Xiaomi 12S Ultra modelindən şirkət nə qədər xeyir qazanır?
Counterpoint bu modelin 8GB operativ yaddaşa və 256GB daxili yaddaşa malik variantını ələ alıb. Xiaomi 12S Ultra modelinin istehsalında istifadə edilən ən bahalı komponent Snapdragon 8+ Gen 1 platformasıdır və qiyməti 128$ təşkil edir. İkinci ən bahalı detal isə AMOLED ekran panelidir ki, şirkət bunun üçün 89$ ödəyir. Üçüncü yerdə isə ekrandan sadəcə 10$ ucuz olan kameralar yerləşir və qiyməti 79$-dır.
Bütün faktorlarla birlikdə smartfonun istehsalı tam olaraq 517$ qiymətə başa gəlir. Xiaomi firmasının isə smartfonu 887$ qiymətdən bazara çıxardığını nəzərə alsaq arada 370$ qiymət fərqi yaranır. Yəni smartfonun qiyməti maya dəyərindən 42% yüksəkdir.
Əslində firmanı buna görə çox da qınamaq olmaz. Məsələn, Galaxy S22 Ultra modelinin ~532$ və ya iPhone 13 Pro modelinin ~570$ maya dəyəri qarşılığında 1000$ ətrafında bazara çıxarıldığını düşünsək Xiaomi 12S Ultra yenə də yaxşı səviyyədədir. Lakin Xiaomi firmasının əvvəlki 5%-lik xeyir vədini xatırlayan heyranlar bu haldan biraz qıcıqlana bilirlər.
Telefonu sınaqdan keçirən istifadəçilərin bildirdiyinə görə Xiaomi 12S Ultra modeli indiyə qədər hazırlanmış ən keyfiyyətli modeldir. Xiaomi Mİ 11 Ultra modelində müəyyən qədər keyfiyyət problemləri yaşanmışdı. Xüsusilə kamera modulunda suyun par yaratması kimi hallar mövcud idi. İddialara görə istehsalçı bu smartfonun paketlənməsinə daha yaxşı diqqət yetirib.
