Ölkələr həm milli, həm də beynəlxalq səviyyədə süni intellekt tənzimləmələri üzərində işləyirlər. Nəhayət, 18 ölkə tərəfindən “Təhlükəsiz süni intellekt sisteminin inkişafı təlimatı” imzalanıb. Beləliklə 18 ölkə “dizayn baxımından təhlükəsiz” süni intellekt barədə razılığa gəlib. ABŞ, Böyük Britaniya və ondan çox başqa ölkə süni intellektin zərərli aktyorlardan necə qorunacağına dair ilk təfərrüatlı beynəlxalq razılaşma əldə olunub.
Bazar günü yayımlanan 20 səhifəlik razılşma sənədində 18 ölkə süni intellekt dizayn edən və istifadə edən şirkətlərin onu müştəriləri və daha geniş ictimaiyyəti sui-istifadədən qoruyacaq şəkildə inkişaf etdirməli və tətbiq etməli olduqları barədə razılığa gəlib. Yəni, şirkətlərdən “dizayn baxımından təhlükəsiz” süni intellekt sistemləri yaratmaları istənilib. Qeyd edək ki, bu müqavilə süni intellekt tənzimlənməsi üçün əhəmiyyətli addım olsa da, məcburi hesab olunmur. Müqavilə əsasən süni intellekt sistemlərinin sui-istifadə üçün monitorinqi, məlumatların manipulyasiyadan qorunması və proqram təminatçılarının yoxlanılması kimi ümumi tövsiyələri ehtiva edir.
ABŞ Kibertəhlükəsizlik və İnfrastruktur Təhlükəsizliyi Agentliyinin direktoru Jen Easterly verdiyi açıqlamada, təlimatların süni intellektin dizayn edilməsindəki ən vacib şeyi ifadə etdiyini bildirib. ABŞ və Böyük Britaniyadan əlavə, yeni təlimatı imzalayan 18 ölkəyə Almaniya, İtaliya, Cənubi Koreya, Norveç, Yaponiya, Fransa, Kanada, Yeni Zelandiya, Çexiya, Estoniya, Polşa, Avstraliya, Çili, İsrail, Nigeriya və Sinqapur aiddir. Bununla da süni intellekt tənzimlənməsi çərçivəsində daha bir genişmiqyaslı razlışama əldə olunub.
