OpenAI şirkətinin mətni şəkillərə çevirə bilən süni intellektinin öz gizli dilini yarada biləcəyi açıqlanıb. Bunu aşkar edən şəxs sistemdəki mənasız sözlərin qarşılığının olduğunu bildirib. OpenAl şirkətinin DALL-E2 adı verilən süni intellektinin bu xüsusiyyəti ABŞ-ın Texas Universitetinin doktorantura tələbəsi tərəfindən kəşf edilib. Gündən-günə inkişaf edən süni intellekt sistemləri həyatımızda əhəmiyyətli yer tutmağa başlayır. ABŞ-da yerləşən OpenAI süni intellekt şirkəti də süni intellekt sahəsindəki aparıcı şirkətlər sırasındadır.
OpenAl süni intellekti özünün başa düşdüyü unikal sözlərə sahibdir
2015-ci ildən fəaliyyət göstərən texnologiya nəhəngi OpenAI mətni görüntüyə çevirə bilən DALL-E adlı süni intellekt sisteminə sahibdir. Şirkət ötən aylarda bu sistemin daha təkmilləşmiş versiyası olan DALL-E2-ni təqdim etdi. Bildirildi ki, bu sistem daha yüksək ayırdetmə, şəkilləri redaktə etmək və bir çox başqa funksiyaları özündə cəmləyib. İndi isə DALL-E2 haqqında çox maraqlı məlumatlar ortaya çıxdı. Texas Universitetinin doktorantura tələbəsi Giannis Daras adlı şəxs DALL-E2-nin gizli bir dil istehsal etdiyini və unikal sözlərə sahib olduğunu öz Twitter hesabında paylaşdığı bir tweetlə ifadə edib. Belə ki, Giannis Daras alqoritmdən “tərəvəzlər haqqında danışan fermerlər” ifadəsinin şəklini hazırlamasını istəyib. Darasın elə məhz bu istəyindən sonra maraqlı fakt ortaya çıxıb. Alqoritmin hazırladığı görüntüdə heç bir dildə mənası olmayan mətn və yazılar görünüb. Ancaq sistemi analiz edən Giannis Daras daha əvvəl yaradılan şəkillərdə yer alan “vicootes” sözünün “tərəvəz” sözü üçün istifadə edildiyini görüb. Yəni süni intellekt tərəvəz sözünün qarşılığı olaraq bu sözü istifadə edir. Bundan başqa Daras görüntülərdə yenə də heç bir mənası olmayan “apoploe vesrreatars” sözləri ilə qarşılaşıb. Sistemi analiz edərək aparılan axtarışlar nəticəsində bu sözlərin də “quş” təsvirləri ilə üst-üstə düşdüyü görünüb. Görüntüdəki digər bir mənasız söz olan “Contarra ccetnxniams luryca tanniounons” sözü isə “həşərat” şəkilləri ilə uyğunlaşdırılıb.
OpenAI-ın süni intellektinin yeni bir dil yaratdığından nə qədər əminik?
Bütün bunların nəticəsində OpenAI şirkətinin DALL-E2 süni intellektinin öz gizli dilini yaratmış ola biləcəyi nəzəriyyəsi ortaya çıxıb. Təbii ki, Darasın nəticələrinin 100% doğru olduğunu demək düzgün deyil. Çünki alqoritmin müxtəlif şəkillər yaratması ehtimalı da var. Analitik Benjamin Hilton bu vəziyyətin təsadüfən yarana biləcəyini ifadə edib. Bununla belə süni intellektin öz dilini yaratması ehtimalı bizə filmləri xatırladır və olduqca həyəcan vericidir.
