ABŞ Ticarət Departamenti Intel və Qualcomm şirkətlərinin Huawei brendinə prosessor və yarımkeçirici tədarük etməsinə icazə verən lisenziyaları ləğv edib. Belə ki, ABŞ Çinin texnologiya liderinə qarşı olan sərt siyasətini davam etdirir. Qeyd edək ki, yeni qərar Huawei brendinin noutbuk və smartfonları üçün çip daşınmasına təsir edəcək.
Financial Times-ın məlumatına görə, lisenziyaların ləğvi Huawei-nin noutbuk, smartfon və digər cihazlarda istifadə etdiyi çiplərin tədarükünə təsir edəcək. Bayden administrasiyasının atdığı addım Huawei-nin biznesinə ciddi ziyan vura və onu ABŞ-ın qabaqcıl yarımkeçirici texnologiyalarına çıxışından məhrum edə bilər. Bu yolla, ABŞ səlahiyyətliləri Huawei-nin mövcud məhdudiyyətlərə baxmayaraq, öz qabaqcıl çiplərini inkişaf etdirmək və istehsal etmək qabiliyyəti ilə bağlı artan narahatlıqlara cavab verib.
Xatırladaq ki, ötən il Huawei öz flaqman çipseti ilə Mate 60 Pro smartfonunu təqdim etməklə dünyanı heyrətə gətirmişdi və bu, ABŞ qanunvericilərinin mövcud sanskiyalarının effektivliyini şübhə altına salmışdı. İndi isə ABŞ sanksiyaların həcmini biraz da genişlətməyə qərar verib. ABŞ Konqresindəki respublikaçılar, xüsusilə senator Marko Rubio, Huawei-nin noutbuklarında Intel-in ən qabaqcıl çiplərindən istifadə etdiyi barədə xəbərlərdən sonra Bayden administrasiyasına Intel və Qualcomm-un ixrac lisenziyalarını ləğv etmək üçün təzyiq göstəriblər. Konqreslə yanaşı, ABŞ Ticarət Nazirliyi də Baydenə təzyiq göstərib.
Ekspertlər bildirirlər ki, bu qərar Vaşinqtonun ABŞ-ın milli təhlükəsizliyinə təhdid olaraq görülən Çin texnologiya şirkətlərinə qarşı qətiyyətini göstərir. Onların fikrincə, Huawei-yə qarşı sərt siyasət növbəti administrasiyada da davam edəcək. Eyni zamanda, qərar yarımkeçirici texnologiyalarının ixracına daha sərt məhdudiyyətlərdən qorxan ABŞ müttəfiqləri arasında narahatlıq yaradıb. Bununla belə, Çinli texnologiya nəhəngi hələ də öz çipsetini hazırlamağa və cihazlarını təkmilləşdirməyə davam edir.
