Alimlər havadan suyu ayırmaq qabiliyyətinə malik Super Absorbent Gel hazırladıqlarını açıqlayıblar. Açıqlamalarda, 1 kiloqram geldən 15% nisbi rütubətdə 6 litr su hasil edə biləcəyi bildirilib.
Bildiyimiz kimi, planetimiz günü-gündən istiləşir. Kənd təsərrüfatı tələbləri, iqlim dəyişiklikləri, yüksək karbon emissiyaları və çirklənmə kimi səbəblər həm Yerin, həm də canlıların gələcəyini ciddi şəkildə təhdid edir. Bu amillərin gələcəkdə daha da ağırlaşa biləcəyi və su qıtlığı kimi dəhşətli nəticələrə səbəb ola biləcəyi də bildirilir. Elm adamları bu qorxunc ehtimallara qarşı lazımi tədbirləri almaq üçün işlərinə davam edirlər. Bu yaxınlarda dərc edilmiş bir araşdırmada su qıtlığına qarşı yeni və maraqlı bir üsuldan istifadə edilə biləcəyi barədə məlumat verilib.
Super Absorbent Gel haqqında
Mütəxəssislər aşağı rütubətli havalarda nəmi uda bilən Super Absorbent Gel hazırlayıblar. Tədqiqatçılardan biri Guihua Yu da mətbuata açıqlamasında “Yeni araşdırma, insanların ən isti, ən quraq yerlərdə su əldə etmək üçün istifadə edə biləcəyi praktik üsulları əhatə edir. Həmçinin içməli suya daimi çıxışı olmayan milyonlarla insana, bu texnologiya asanlıqla içməli su hazırlamağa imkan yaradacaq.” deyə qeyd edib.
Qiyməti münasib olduğu üçün hər kəs istifadə edə biləcək
Açıqlamalara görə, alimlər geli bitkilərdə olan sellüloza törəməsi, yeməli konjac bitkisindən əldə edilən lif və litium xlorid duzundan yaradıblar. Bildirilib ki, maye inqrediyentlər qarışdırılaraq qaba tökülüb, iki dəqiqə dayanıb, sonra nazik təbəqədə dondurulub. Tədqiqatda 1 kiloqram gel hazırlamaq üçün lazım olan materialların çox aşağı qiymətə olmasına da diqqət çəkilib.
Kimya mühəndisi Youhong Guo da bununla bağlı açıqlamalarında “Bu gelin sintezi çox sadədir” ifadələrindən istifadə edərək məhsulun hər kəs tərəfindən istifadə oluna biləcəyini vurğuladı. Quruduqdan təxminən 20 dəqiqə sonra gel təbəqələrinin nəmlə doyduğunu bildirən tədqiqatçılar geldən içilə bilən maye əldə etmək üçün qızdırılmasının lazım olduğunu əlavə ediblər.
Sonda bildirilib ki, gel digər uducu materiallarla müqayisədə suyu kifayət qədər səmərəli udur, suya zərərli kimyəvi maddələr qatmır və təkrar istifadə zamanı xarab olmur. Bununla belə, testlər milliqram gellərlə aparılmışdır. Nəticələrin kiloqramla hesablandığını qeyd etmək lazımdır. Mütəxəssislər mövzu ilə bağlı daha çox iş aparılmasına ehtiyac olduğunu və su qıtlığı ilə bağlı tədbirlərin gücləndirilməsinin vacibliyini vurğulayıblar.
