Apple, Google və bir çox digər böyük platformalara aid düz 184 milyon hesab məlumatı qısa müddətə də olsa ifşa olunub. Belə ki, Facebook-dan Netflix-ə və hətta dövlət qurumlarına qədər bir çox xidmətlər üçün giriş məlumatları sızdırılıb. Bundan əlavə, 29 müxtəlif ölkəyə aid cəmi 220 rəsmi e-poçt ünvanı var.
Apple, Google və Meta kimi platformalara aid milyonlarla hesab üçün istifadəçi məlumatlarını ehtiva edən geniş miqyaslı verilənlər bazası məhdud müddət ərzində onlayn olaraq istifadəyə verilib. Məlumat bazasında bəzi dövlət qurumlarına məxsus ünvanların da yer alması hadisənin təkcə fərdləri deyil, həm də ölkələri maraqlandıran bir ölçüsü olduğunu ortaya qoyub. Kibertəhlükəsizlik üzrə tədqiqatçı Jeremiah Fowler mayın əvvəlində heç bir parol qorunması olmayan Elastik verilənlər bazası kəşf edib. Təxminən 47 GB ölçüsü olan bu verilənlər bazasında ümumilikdə 184 milyondan çox istifadəçi qeydi var idi. Verilənlər bazasında hər bir qeyddə mail hesabı, istifadəçi adı, və şifrə məlumatları mövcud olub.
“Senha” adlanan parol sahəsi bu məlumatların portuqal dilli mənbədən toplanmış ola biləcəyini göstərir. Nümunə olaraq araşdırılan 10.000 qeyddə isə Facebook, Google, Instagram, Roblox, Discord kimi platformalarla yanaşı Netflix, Microsoft, PayPal, Apple və Amazon kimi bir çox xidmətə aid hesablar tapılıb. Sızmanın əhatə dairəsi həmçinin “bank” və “pul kisəsi” kimi açar sözlərlə əlaqəli yüzlərlə qeyd və 29 müxtəlif ölkəyə aid 220 dövlət e-poçt ünvanı ilə genişlənib. Məlumatların kimin topladığı və hansı məqsədlə saxlandığı dəqiq müəyyən edilməmişdir. Lakin Fowler hesab edir ki, bu qədər böyük verilənlər bazası zərərli proqramlar vasitəsilə pozulub. Məlumat bazasının yerləşdiyi infrastrukturun sahibi World Host Group müvafiq serverin saxta istifadəçi tərəfindən idarə edildiyini və sistemin bağlandığını açıqlayıb.
