Çin markaları elektromobil bazarında iddialarını sürətlə artırmağa davam edirlər. Geely şirkətinin premium elektrikli avtomobil markası Zeekr, məşhur 001 modelinin yenilənmiş variantını təqdim edib. Zeekr 001 modelinin 2023-cü il buraxılışının qiyməti təqribi 300 min yuandan başlayır. Buda təxminən 74 min Azərbaycan manatına bərabərdir.
Yenilənmiş Zeekr 001 elektromobilində görünüşündə çox da dəyişiklik yoxdur. Beşqapılı elektomobilin uzunluğu 4970 mm, eni 1999 mm və hündürlüyü 1560 mm olmaqla demək olar birə-bir eynidir. Sadəcə eksteryerdə yeni modelin rəng seçimlərinə narıncı, mavi və gecə qara rəngləri əlavə edilib. Bu güclü versiya 86 kVtsvə ya 100 kVts batareya paketi ilə Çində qüvvədə olan CLTC normasına uyğun olaraq 546 km və ya 656 km məsafə qət etməyi bacarır.
2023 model Zeekr 001 modelinin əsas dəyişikliyi onun texniki tərəfindədir. İkimühərrikli tam ötürücülü versiyası 400 kVt güc və 686 Nm fırlanma anı hasil edir. 0-100 km/saat sürətlənməni 3,8 saniyəyə tamamlayır.
Tək mühərrikli arxa ötürücülü versiya 200 kVt gücə və 343 Nm fırlanma anına malikdir. Bu versiyanı xüsusi edən detal, Çin batareya nəhəngi CATL-nin Qilin batareyasından istifadə etməsidir. Şirkətin üçüncü nəsil “cell-to-pack” texnologiyasından istifadə edən elektromobil, 100 kVts və ya 140 kVts olmaqla 2 fərqli batareya paketi ilə 741 km və ya 1032 km məsafə qət edə bilir. Zeekr tərəfindən edilən açıqlamaya görə, bütün versiyalarda DC sürətli şarj dəstəyi var. Digər tərəfdən, 1032 km qət edən modeldən ilkin mərhələdə yalnız min ədəd buraxılacaq.
İnteryerə gəldikdə isə sadə, bir o qədər də dəbdəbəlidir. Sükan çarxının arxasında 8,8 düymlük rəqəmsal alətlər paneli mövcuddur. Konsolun mərkəzində böyük 14,7 düymlük sensorlu multimedia ekranı isə sələfi ilə eynidir. Oturacaqlar Nappa dərisi ilə örtülmüşdür və dörd müxtəlif rəng seçimində mövcuddur: (karbon qara, azot mavi, platin boz və titan qəhvəyi).
2023 model Zeekr 001 elektromobili ön oturacaqları isitmə, havalandırma və masaj funksiyalarına malikdir. Bundan əlavə, arxa tərəfdəki 5,7 düymlük çoxfunksiyalı sensor ekran arxadakı sərnişinlər üçün səyahəti daha zövqlü edir. Yenilənmiş Zeekr 001, yollarda aktiv zolaq dəyişdirmə və dönmə kimi qabaqcıl avtopilot funksiyalarını dəstəkləyir.
