Bu gün silikon günəş panelləri sözün əsl mənasında elastiklikdən məhrum olub. Buna səbəb isə onların nisbətən qalın dizayna sahib olması və bu səbəbdən də ağır olmalarıdır. Eləcədə günəş panellərinin çəkisinin ağır olması onların aerokosmik və geyilə bilən elektronikada geniş istifadəsinə maneə olur. Lakin indi alimlər aerokosmik və geyilə bilən elektronikalar üçün ultra incə silikon günəş panelləri hazırlayıblar.
Çin dövlət media orqanı olan “Science and Technology Daily” bu yaxınlarda Jiangsu Elm və Texnologiya Universitetinin professoru Li Yangdan sitat gətirərək bildirib ki, silikondan hazırlanan kristal silisium günəş batareyaları elektrik enerjisi istehsalı üçün ən yetkin və ən geniş istifadə olunan həlldir və bu belə də qalacaq. Lakin bildirilir ki, müasir dövrdə günəş panelləri iki böyük texnoloji problemlə üzləşir. Mövcud silikon fotovoltaik panellərin bir çatışmazlığı, geniş sahəli silisium hüceyrələrinin enerjiyə çevrilmə səmərəliliyinin 26 faizlə məhdudlaşmasıdır. Digər məhdudiyyət və ya problem isə hüceyrənin qalınlığıdır ki, adətən bu 150 ilə 180 µm arasındadır. Bu isə onları əyri damlarda, peyklərdə və kosmik stansiyalarda quraşdırmaq üçün daha çevik və yüngül material tələb edən tətbiqlərdə istifadəni çətinləşdirir.
Jiangsu Elm və Texnologiya Universiteti, Avstraliyanın Curtin Universiteti və LONGi Green Energy Technology-dən professor Linin rəhbərlik etdiyi alimlər qrupu Nature jurnalında kristal silisiumdan təxminən 50 µm qalınlığında fotopanelin yaradılması barədə hesabat dərc etdirdilər. Bu, adi A4 ölçülü kağızdan daha nazikdir. Bu fotopanel kağız kimi yarıya qatlana bilməz, lakin o, qırılmadan kifayət qədər əyilə bilər. Daha da əhəmiyyətlisi, ultra nazik fotopanelin səmərəliliyi 26 faizi ötüb. Alimlər qalınlığı 55 ilə 130 µm arasında dəyişən daha bir neçə fotovoltaik element yaratdılar və onların hamısının səmərəliliyi 26 faizdən çox idi.
