Son dövrlərdə Avropada, xüsusi ilə Almaniyada havalar buludlu və küləksiz olub. Nəticədə isə bərpa olunan enerji mənbələri tükənmə həddinə qədər gəlib çatıb. Beləliklə, Avropada bərpa olunan enerji mənbələri tükəndiyi üçün elektrik böhranı yaşanır, xüsusilə Almaniyada qiymətlər 8 dəfə artıb.
Avropada bərpa olunan enerji mənbələrinin kifayət qədər elektrik enerjisi istehsal edə bilməməsi qiymətləri kəskin şəkildə artırıb. Külək elektrik stansiyalarının dayanması qazla enerji istehsalını zəruri hala gətirib. Qeyd edək ki, Almaniyada elektrik enerjisinin qiymətləri pik saatlarda 8 dəfə artıb. Mütəxəssislər bu vəziyyətin region üçün mühüm xəbərdarlıq əlaməti olduğunu vurğulayırlar. Ümumavropa enerji birjası Nord Pool-un məlumatına görə, çərşənbə günü, noyabrın 6-da Almaniyada elektrik enerjisinin topdansatış qiymətləri axşam saatlarında bir MVt/saat üçün dərhal 805-820 avroya çatıb. NordPool birjasının məlumatına görə, saat 18.00-20.00 arasında olan bu qiymət son illərin rekordunu qıraraq enerji böhranının pik həddə olduğu 2022-ci il dövrünü xatırladıb. Bu qiymət artımının əsas səbəbi bütün bütünlükdə Avropada yaşanan elektrik böhranı hesab olunur.
Maraqlısı budur ki, cari illik orta qiymətlər 2020-ci ilə nisbətən iki dəfədən çoxdur. Bu hava hadisəsi almanca “Dunkelflaute” adlanır. Yüksək təzyiq sistemlərinin statik vəziyyətinə görə küləklərin xeyli zəiflədiyi bu dövrdə Almaniyada külək enerjisi istehsalı demək olar ki, sıfıra bərabərdir. Bu dövrdə günəş enerjisi istehsalı da azalıb. Fraunhofer Günəş Enerji Sistemləri İnstitutunun məlumatlarına görə, Almaniyada külək enerjisi istehsalı illik orta hesabla 32 faizdən 7 faizə düşüb. Oxşar vəziyyət Böyük Britaniyada da baş verib. National Grid məlumatına görə Böyük Britaniyada külək enerjisi istehsalı 7,6 faiz azalıb. Qaz və kömür elektrik stansiyalarına tələbat artıb. Böyük Britaniyada qazla işləyən elektrik enerjisi istehsalı 60 faizə, Almaniyada isə 30 faizə yüksəlib.
