Xatırlayırsınızsa, ötən il taksilərlə bağlı qanun qəbul edilmişdi. Hazırda isə həmin qanunun icrasına başlanılıb. Ötən il taksilərin sayı Bakıda 67 min olsa da, hazırda bu rəqəm 60 minə endirilib. Həmçinin Rəqəmsal inkişaf və nəqliyyat nazirinin müavini Rəhman Hümmətov bildirib ki, Bakıda 20 min taksiyə ehtiyac olsa da, bu say hazırda 60 mindir.
Milli Məclisdə “Nəqliyyatın idarə edilməsində yeniliklər və çağırışlar” mövzusunda dinləmə keçirilib və nazir müavini bütün bu açıqlamaları bu dinləmə çərçivəsində bildirib. Əlavə olaraq qeyd edək ki, deputat İltizam Yusifov da parlamentdə dinləmələr zamanı bu mövzuya toxunub. Onun sözlərinə görə, “Tıxacların aradan qaldırılması üçün yolların genişləndirilməsi yox, yolların seksiyalara bölünməsi prosesi getməlidir. Bundan əlavə, yollarda hərəkər zolaqlarının enini bir qədər daraltmalıyıq. Digər bir məsələ tıxacların atmosfer çirkləndirməsi ilə bağlıdır. Biz bu sahədə elektrik avtomobillərinin istifadəsini təşviq etməliyik”.
Həmçinin deputat təklif edib ki, bütün elektromobillərə yaşıl qeydiyyat nömrəsi verilsin və onların həm dayanacaqlardan pulsuz istifadəsinə, həm avtobus, həm də xüsusi təyinatlı avtomobillər üçün nəzərdə tutulan hərəkət zolaqlarından istifadəsinə icazə verilsin. Deputat onu da əlavə edib ki, “30 ildən artıqdır ki, eyni sahibkar, eyni şirkət bu işi 30 ildə təşkil edə bilməyibsə, bundan sonra necə edəcək?! Biz rəqabət mühiti yaradaraq yeni, iri tutumlu avtobuslarla paralel marşrutlar açmalıyıq”.
Taksi xidməti ilə bağlı isə deputat bildirib ki, Bakı şəhərində London taksisi ilə başlanan bir işi – taksi xidmətini – “Prius”la bitirdik. Həmçinin o təklf edib ki, vahid standartı olan eyni tip, model, rəng, tələblər olan yeni bir taksi xidməti yaradılmalıdır. Habelə, biznes qurumları, sahibkarlara vahid taksi sisteminə qoşulmaqla kiçik avtoparkların təşkilinə imkan yaratmalıdır. Parklamaya gəldikdə deputat bildirib ki, Bakı şəhərinin küçələrində 1 zolağın parklama ərazisi olması ideyasını həmişə təklif edib və bunu da dəstəkləyib: “Çünki Azərbaycanda ticarət və xidmət obyektləri biləvasitə yol kənarında yerləşdirilməsi mental olaraq qəbul edilib. Amma burada başqa bir məqam var: Azərbaycan vətəndaşı mobil qurğulardan istifadə etməyə məcbur deyillər. Qanun isə ödənişli parklama yerlərində mütləq mənada parkomatın qoyulmasını tələb edir. Ödəniş üsulları isə mobil tətbiq, internet, SMS vasitəsilə ola bilər. Təklif edirəm ki, təcili olaraq bu sahədə bu qanunvericilik bazasını təkmilləşdirək”.
