Elon Musk, başdan sona cəmi 4 ayda qurulan dünyanın ən böyük Nvidia qrafik kartlı superkompüteri ‘Colossus’u istifadəyə verdiyini açıqlayıb. Qeyd edək ki, bu sistem xAI şirkəti üçün süni intellektləri öyrətməyə başlayacaq.
Daim müzakirələrin mərkəzində olan Elon Musk texnologiya dünyasında nəhəng addımlar atmağa davam edir. Bu yaxınlarda yeni süni intellekt təşəbbüsü xAI tərəfindən istismara verilən Colossus adlı superkompüter bu sahədə dönüş nöqtəsi kimi qiymətləndirilir. Cəmi 122 gün ərzində tamamlanan və Nvidia-nın ən güclü GPU-ları ilə təchiz edilən Colossus, dünyanın ən güclü süni intellekt təlim sistemi kimi təqdim edilir. Keçən ilin iyulunda qurulan xAI şirkəti, ABŞ-ın Tennessi ştatında Colossus inşa edib. Beləliklə, 100.000 Nvidia Hopper H100 prosessoru ilə təchiz edilmiş bu nəhəng superkompüter şirkətin süni intellekt modeli Grok-un hazırlanmasında istifadə olunacaq.
Qeyd edək ki, Grok OpenAI-nin GPT-4 modelinə rəqib kimi hazırlanır və ilkin olaraq Musk-ın X sosial media platformasının ödənişli abunəçilərinə təklif olunur. Bununla belə, bir çox Tesla mütəxəssisləri Grokun gələcəkdə Teslanın insanabənzər robotu Optimusun süni intellekt beyni olacağını proqnozlaşdırır. Colossusun tikintisi başa çatdıqdan sonra Musk, süni intellekt təlim sistemini “dünyanın ən güclü süni intellekt təlim sistemi” olaraq xarakterizə edib. Gələn aylarda Musk, Nvidia-nın yeni H200 seriyalı prosessorlarından daha 50.000 ədəd satın alaraq Colossusun emal gücünü ikiqat artırmağı planlaşdırır. Bu addım xAI-ni süni intellekt sahəsində zirvəyə çatdırmaq məqsədi daşıyır. Grok-3 adlı yeni süni intellekt modelinin dekabr ayında buraxılması gözlənilir. Bu modelin dünyanın ən güclü süni intellekt modeli olacağı proqnozlaşdırılır. Musk, 15.000 Nvidia H100 ilə öyrədilmiş Grok-2-nin ilk beta versiyasını keçən ay istifadəçilərə təqdim edib.
