Son zamanlarda texnologiya nəhəngləri bulud sistemindən istifadə edən süni intellekt alətlərinin istifadəsindən narahtdır. Bu şirkətlərdən biri də məhz Apple şirkətidir. Belə ki, Apple məxfi məlumatların yayılmasından narahat olduğu üçün işçilərinə ChatGPT və digər süni intellekt alətlərindən istifadə etməyi qadağan edib. Qeyd edək ki, yeni qərar barəsində Apple şirkəti özü işçilərinə məlumat verib. Maraqlısı budur ki, Apple özü də süni intellekt aləti hazırlamağı planlayır.
Ümumiyyətlə Microsoft şirkəti tərəfindən dəstəklənən ChatGPT bir çox texnologiya nəhənginin narahatlığına səbəb olur. Xatırladaq ki, mart ayında verilən qərar ilə ChatGPT istifadəçilərin söhbət tarixçələrini görməsinə icazə vermişdi. Bu qərar bir çox texnologiya şirkəti tərəfindən bir mənalı qarşılanmamışdı. Bu şirkətlər arasında məhz Apple şirkəti də yer alırdı. Apple ChatGPT və digər süni intellekt alətlərinin şirkətin məxfi məlumatlarını risk altına atdığını iddia edir. Məhz bu səbəbdən də şirkət özünəməxsus süni intellekt aləti hazırlayır. Qeyd edək ki, şirkətin yeni süni intellekt layihəsinə 2018-ci ildə Google şirkətindən ayrılaraq Apple şirkətinə gələn John Giannandrea rəhbərlik edir.
Apple şirkəti texnologiya sahəsində öz məxfilik siyasəti ilə tanınır. Belə ki, Apple məhsulundan istifadə edənlərin əksəriyyəti şirkətin tamamilə məxfilik üzərinə fokuslanığı üçün ona inanır və məlumatlarının qorunduğundan əmin olur. Məhz bu səbəbdən də Apple hakerlərin asanlıqla hədəfinə çevrilə biləcək bulud sisteminə əsaslanan ChatGPT süni intellekt alətinin istifadə olunmasını qadağan edir. Qeyd edək ki, şirkətin əzəli rəqiblərindən olan Samsung şirkəti ChatGPT alətindən imtina edən ilk şirkətlərdən hesab olunur.
