Apple şirkətinin izləmə cihazı olan AirTag Kanadada avtomobil oğurluğunda geniş istifadə olunmağa başlayıb. Belə ki, Monreal şəhərində avtomobil oğurluğu daha çox yayıldığı üçün polis sürücülərə AirTag ilə bağlı xəbərdarlıq edib. Əgər belə hallar getdikcə daha da çoxalarsa Apple ciddi probləmlərlə üzləşə bilər.
Kanadanın Monreal şəhərində avtomobil oğurluğu geniş vüsət alıb. Məlumata görə, cinayətkarlar tez-tez Apple şirkətinin AirTag cihazından istifadə edərək bahalı avtomobilləri və ya yolsuzluq avtomobillərini təyin edirlər. Daha sonra isə onlar bahalı avtomobilləri oğurlayaraq dünyanın dörd bir yanına göndərirlər. Əslində Apple AirTag cihazının xüsusi hallarda xəbərdarlıq göndərməsini təmin edib. Belə ki, əgər AirTag ona sahib olan şəxsə aid deyilsə yəni, onun Apple cihazına bağlı deyilsə, cihaz həmin şəxsə xəbərdarlıq göndərir. Bundan əlavə, Android smartfonlarda AirTag daxil olmaqla naməlum Bluetooth izləyicilərini aşkarlaya bilir.
Kanadadakı bir sığorta agentliyi bildirir ki, təkcə 2022-ci ildə Kanadada 105 mindən çox avtomobil oğurlanıb. Avtomobil oğrularının oğurlanacaq avtomobilləri seçmək üçün Apple şirkətinin AirTag cihazından istifadə etdiyi məlumdur. Həmçinin Monrealda bir çox insan smartfonlarına göndərilmiş xəbərdarlıq vasitəsi ilə avtomobillərində quraşdırılan AirTag cihazını aşkar ediblər. Avtomobil oğurluğu bir müddətdir artan problem olsa da, Monrealda cinayətkarlar avtomobilləri izləmək, oğurlamaq və satmaq üçün texnologiyadan istifadə edirlər.
