Bildiyimiz kimi, Elon Musk uzun müddətdir ki, Neuralink layihəsi çərçivəsində xəstə insanların beyninə çip yerləşdirməklə onların müxtəlif cihazlardan istifadə edə bilməsini təmin etməyə çalışır. Məhz bu layihə üçün sınaqlar çox uzun mərhələlərdən sonra ötən aylarda başlamışdı. Müxtəlif könüllü insanların qatıldığı sınaqda bir şəxs Neuralink çipi ilə kompüterdə şahmat oynamağı bacarmışdı. İndi isə beyninə Neuralink çipi taxılmış şəxs ilk problem ilə üzləşdiyini açıqlayıb.
Beləliklə, şirkət beyin çipinin implantasiyası ilə bağlı problemlər yaşadığını açıqlayıb. Yanvar ayında Neuralink tədqiqatının bir hissəsi olaraq 29 yaşlı Noland Arbaugh adlı xəstəyə beyin çipi implantasiya edilmişdi. Arbaugh 100 günlük müddət ərzində cihazdan fəal şəkildə istifadə edib. Hətta X-də canlı yayıma başlayaraq oyunlar oynamışdı. Ötən ay isə Neuralink əməliyyatın olduqca yaxşı keçdiyini və xəstənin sadəcə bir gün ərzində əvvəlki həyatına qayıtdığını açıqlamışdı.
Şirkətin internet saytında verilən məlumata görə, şirkətin Link adlandırdığı sistem insan saçından daha nazik olan 64 “ip” boyunca 1024 elektroddan istifadə edərək sinir siqnallarını qeyd edir. Lakin Arbaughun beyninə implantasiya edilmiş çipdə bu iplərdən bəziləri qopduğu üçün problemə səbəb olub. Şirkət əvvəlcə implantı çıxarmağı düşünsə də, problem Arbaughun təhlükəsizliyi üçün birbaşa risk yaratmadyıb. Digər tərəfdən, şirkət müvəqqəti həll yolu kimi qeyd alqoritmi ilə birlikdə istifadəçi interfeysini təkmilləşdirdiyini və siqnalları kursor hərəkətlərinə çevirmək üçün texnikaları təkmilləşdirməyə çalışdığını bildirib.
