Qlobal avtomobil sənayesində köklü dəyişikliklərə səbəb olacaq yeni və nəhəng bir əməkdaşlıq rəsmiləşmək üzrədir. Aylarla davam edən şayiələrdən sonra ABŞ-ın avtomobil nəhəngi “Ford” və Çinin “Geely” şirkəti tarixi bir müqaviləyə imza atıblar. Razılaşmaya əsasən, hər iki şirkət “Ford”un İspaniyanın Valensiya şəhərində yerləşən 50 illik əfsanəvi zavodunu birgə idarə etmək üçün yeni ortaq müəssisə yaradır. Gələn il tam rəsmiləşəcək bu yeni qurumun səhmlərinin 66%-i “Ford”a, 34%-i isə “Geely Auto”ya məxsus olacaq.
Hazırda yalnız “Ford Kuga” modelinin istehsal edildiyi Valensiya zavodunun bu ortaqlıq sayəsində illik istehsal gücünün 500 min avtomobilə çatdırılması və yeni iş yerlərinin açılması hədəflənir. 2029-cu ilə qədər konveyerdən düşəcək modellər isə indidən böyük maraq doğurur:
Bəs “Ford” nəyə görə məhz “Geely”ni seçib? Şirkət rəsmiləri bu suala aydınlıq gətirərək, Çin markasının elektromobil vizyonunun və aşağı xərcli istehsal qabiliyyətinin həlledici rol oynadığını bildiriblər. Avropa bazarında rəqabətin və maliyyə təzyiqinin görünməmiş səviyyəyə çatdığını qeyd edən “Ford”, Çindəki ucuz istehsal üstünlüyünü İspaniyaya daşıyaraq qitədə ən sərfəli avtomobilləri istehsal etməyi planlaşdırır. “Geely” isə bu strateji həmlə ilə qarşıdakı 5 il ərzində Avropadakı satışlarının ən azı üçdə birini məhz yerli istehsal hesabına təmin etməyi qarşısına məqsəd qoyub.
Bu nəhəng ortaqlığın markanın Avropadakı digər zavodlarının fəaliyyətinə heç bir mənfi təsiri olmayacağı açıqlanıb. Almaniyada “Volkswagen MEB” platforması üzərində yığılan “Explorer” və “Capri” modellərinin, eləcə də Rumıniyada istehsal olunan “Puma” modelinin istehsal qrafiki olduğu kimi davam edəcək. “Ford”un Avropa üzrə rəhbərlərindən olan Cim Baumbik onu da vurğulayıb ki, birgə hazırlanacaq yeni krossover sadəcə üzərinə “Ford” loqosu yapışdırılmış sıradan bir avtomobil olmayacaq; o, tamamilə özünəməxsus dizayn və “Ford” mühəndisliyi ilə seçiləcək.
