Xiaomi şirkəti bu gün keçirdiyi təqdimatda bir neçə yeni məhsulunu və ən əsası Xiaomi 13 seriyası cihazlarını təqdim etdi. Xiaomi 13 və Xiaomi 13 Pro olmaqla 2 fərqli smartfon qarşımıza çıxarıldı. Bu smartfonlar sahib olduqları texniki imkanlar nəzərən yaxın olsalar da, olduqca fərqli dizaynda çıxış edirlər. Tamamilə müxtəlif gövdə dizaynı və ölçülər ilə Xiaomi 13 modeli iPhone modellərini xatırladarkən, Xiaomi 13 Pro standart flaqmanlarını xatırladır.
Gəlin elə mövzuya dizayndan danışaraq başlayaq. Belə ki, hər iki cihazın kamera modulu dizaynı bir-birinə olduqca bənzərdir. Gördüyünüz kimi smartfonların kvadrat kamera modulu daxilində 3 ədəd fərqli kamera sensoru quraşdırılıb. Dizayn cəhətdən kameralar bir-birlərinin eynisi olsa da texniki cəhətdən fərqlənirlər. Bu barədə aşağıda bəhs etmişik. Smartfonların gövdəsinin fərqlənməsi isə uyğun olaraq fərqli zövqlərə xitab etməkdədir. Əgər qıvrımlı ekranı sevmirsinizsə, cüzi zəif Xiaomi 13 modelini almaqla biraz kompakt və tamamilə düz gövdəyə, ekrana sahib cihaz əldə edəcəksiniz. Üstəlik Xiaomi 13 modelinin ekranı o qədər mükəmməldir ki, kənar çərçivələri yanlardan 1.61 mm, çənə qismindən (aşağıdan) sadəcə 1.81 mm qalınlığındadır. iPhone 14 seriyasından belə olduqca nazik kənar çərçivələr, adi gözlə tam simmetrik görünməkdədir. Şəkillərdən də modellərin müqayisəsini müşahidə edə bilərsiniz.
Yeni Xiaomi 13 seriyası texniki cəhətdən nə vəd edir?
Belə ki, başlayaq elə cihazların performansı barədə danışmağa. Hər iki cihazın Snapdragon 8 Gen 2 çipsetindən güc aldığını deməyə yəqin ki, ehtiyac yoxdur. Termal performansı olduqca yaxşılaşdırılan cihazların, aparılan testlər zamanı ən yüksək performansda stabil nəticə verdiyi bildirilir. Uyğun olaraq 8533Mbps tezlikdə işləyən LPDDR5X operativ yaddaşa və UFS 4.0 yaddaş çipi ilə təchiz edilən Xiaomi 13 seriyası bazardakı ən yüksək performansa malik cihazlar hesab edilirlər.
Performans cəhətdən diqqətimizi çəkən əsas detal bundan ibarətdir ki, daha kiçik ölçülü Xiaomi 13 modelində 4642mm² ölçülü buxar qazanlı soyutma sistemi işlədilərkən, Xiaomi 13 Pro modelində 3400mm² ölçülü buxar qazanlı soyutma sistemi quraşdırılıb. Nəticə etibarilə daha kiçik olmasına baxmayaraq modeli kağız üzərində nisbətən daha avantajlı görünməkdədir. Lakin smartfonların istehsal edildiyi materialdan tutmuş, mühəndisliyinə qədər detallar və.s da buna təsir edə biləcəyindən əminliklə danışmaq mümkünsüzdür.
Ekran panelləri barədə danışsaq Xiaomi 13 modelinə 6.36 düymlük, Xiaomi 13 Pro modelinə isə 6.73 düymlük OLED ekran quraşdırılıb. Hər iki ekranın ən diqqət çəkən ilk xüsusiyyəti 1900 nit ekran parlaqlığına sahib olmalarıdır. Lakin çox təəssüf ki, Xiaomi 13 Pro modelində 2K ekran quraşdırıldığı təqdirdə, Xiaomi 13 hələ də FHD+ ekran paneli ilə təchiz edilib.
Kənar çərçivələri çox nazik və demək olar simmetrik olan ekran panelləri 120Hz adaptiv görüntü yeniləmə tezliyinə, 240Hz sensor tezliyinə malikdirlər. Samsung tərəfindən istehsal edilən E6 ekran panelləri Gorilla Glass Victus ilə qorunur. Dolby Vision, HDR10+ dəstəkləyir və deltaE 0.38 dəyərinə rəng kalibrasiyası ediliblər və uyğun olaraq rəngləri lazımi dəqiqlikdə göstərə bilir. Göz üçün zərərli olan AMOLED panellərə xas titirəmə olmaması üçün 1920Hz tezlikli PWM texnologiyasını dəstəkləyir və SGS göz sağlamlığı sertifikatına sahibdirlər. Lakin Xiaomi 13 modelində tezlik 1920Hz deyil, daha aşağıdır. Tezlik dəyəri isə naməlumdur.
Xiaomi 13 seriyası kamera performansı cəhətdən nə gətirir?
Kamera performansına Xiaomi 13 seriyasının “zəif bəndi” olan Xiaomi 13 ilə başlamaq mütləqdir. Nəticədə Xiaomi 12 ilə müqayisədə şirkət bu cihazın kamera performansına əhəmiyyətli dərəcədə diqqət edib. Ötən il sadə Xiaomi 12 modelində telefoto kamerası mövcud deyildi. Şirkət “makro-telefoto” deyə əhəmiyyətsiz bir kamera ilə, adətən göz boyamışdı. Xiaomi 13 isə 1/3.75 düymlük 10MP təsvir ölçülü OIS ilə gücləndirilmiş 3 qat optik yaxınlaşdırma edə bilən həqiqi telefoto kamerası ilə təchiz edilib. Əsas kamerası isə 1/1.49 düymlük IMX800 50MP olub HyperOIS stabilizatoru ilə gücləndirilib. Sonuncu və üçüncü kamerası isə standart 12MP ultra-geniş bucaqlı kameradır.
Xiaomi 13 Pro modelində isə Xiaomi 12S Ultra modelindən gələn 1 düymlük IMX989 50MP kamera sensoru quraşdırılıb. “8P” 8 elementli obyektivə malik IMX979 sensoru LEICA texnologiyaları ilə də optimizasiya edilib. Telefoto kamerası tərəfində 75mm fokus məsafəsinə sahib JN1 50MP sensoru işlədilib və 3,2 qat optik yaxınlaşdırma dəstəkləyir. Üçüncü kameramız olan ultra-geniş bucaqlı obyektiv isə yenə JN1 50MP sensoruna malikdir. Xiaomi 13 Pro modelindəki ultra-geniş bucaqlı kamera avtofokus texnologiyası üçün də ayrıca sazlanıb. Bu smartfonun da həm əsas, həm telefoto kamerasında OIS stabilizatoru mövcuddur. Qeyd edək ki, Xiaomi 13 seriyası daxilindəki hər iki cihazda 32MP təsvir ölçülü selfi kamerası quraşdırılıb. Kameranın proqram təminatı isə LEICA əməkdaşlığında hazırlandığı üçün, standart Xiaomi modelləri ilə müqayisədə görüntüləri daha həssas işləyə bilirlər.
Dolby Vision HDR dəstəyinə malik cihazlarla, 4K keyfiyyətdə 24FPS və ya 4K keyfiyyətdə 60FPS video qeydlər almaq mümkündür. Lakin selfi kamerası hələ də 1080P keyfiyyətdə maksimum 30FPS videolar qeydə alır.
Smartfonların qiyməti və digər detallar
Xiaomi 13 Pro modelinə 4820mAs həcmli, Xiaomi 13 modelinə isə 4500mAs həcmli batareyalar quraşdırılıb. Batareyaya Xiaomi 13 seriyası hər iki cihaza quraşdırılan Surge G1 çipi nəzarət edir. Hər iki cihaz 50 Vatt kabelsiz, 10 Vatt tərs şarj dəstəkləyir. Lakin Xiaomi 13 Pro modeli kabel ilə 120 Vatt sürətlə şarj olarkən, Xiaomi 13 modeli 67 Vatt dəstəkləməkdədir.
Smartfonların ən vacib xüsusiyyəti IP68 sertifikatını dəstəkləməsidir. Beləliklə, cihazlar suya və toza qarşı tam dayanıqlıdırlar. Digər bir tərəfdən Xiaomi 13 seriyası “Nano-Skin” texnologiyası ilə təmin edildiyi üçün paslanmadan, rənginin solmasından, istənilən aşınmadan və ən əsası ləkələrdən qorunacaqdırlar. Boya ləkəsi belə sadəcə salfetlə silinə biləcəkdir.
Cİhazlar Dolby Atmos dəstəkli həqiqi “Stereo” səs ucaldanlar ilə təchiz olunublar. Harman/Kardon imzasının isə olmadığını müşahidə edirik. Buna səbəb ya reklamlı əməkdaşlığın sonlanması, ya da ümumiyyətlə fərqli markaya aid səs ucaldanların quraşdırılması ola bilər. Sadə Xiaomi 13 modeli aşağıdakı eksklüziv rənglərdə təqdim edilsə də bu yalnız Çin üçün keçərlidir. Digər bir tərəfdən smartfonlar rəqəmsal avtomobil açarı yeniliyini də yalnız Çində dəstəkləyəcəklər. Android 13 üzərinə MIUI 14 ilə qutudan çıxmaqdadırlar. MIUI 14 interfeysi, Xiaomi Buds 4 qulaqlığı, Xiaomi Watch S2 ağıllı saatı və Xiaomi Mini Host barədə detallara isə ayrı bir məqalədə nəzər yetirəcəyik. Cihazların qlobal bazarda yanvar ayında nümayiş etdirilməsi gözlənilir.
Xiaomi 13 seriyası qiyməti
Xiaomi 13 modelinin 8-128GB başlanğıc versiyası 3999 Yuan (575$), Xiaomi 13 Pro modelinin 8-128GB başlanğıc versiyası isə 4999 Yuan (720$) təşkil edir.
