Apple şirkəti ötən gün axşam iPhone 14 seriyası modellərini təqdim edərkən, Facebook səhifəmiz və Telegram kanalımız üzərindən yenilikləri sizlərlə bölüşdük. Böyük bir ehtimalla smartfonların texniki xüsusiyyətləri barədə bir çox səthi məlumatlardan xəbərdarsınız. Bu məqaləmizdə iPhone 14 seriyasından sizə detallı bəhs edərək aşağıdakı suallara cavab axtaracağıq.
- iPhone 14 seriyasında diqqət edilməli texniki fərqlər hansılardır?
- iPhone 14 seriyasından seçim edərkən nəyə diqqət etmək lazımdır?
- Keçməyə dəyər?
Belə ki, iPhone 14 seriyası və təqdim edilən bu yeni cihazlarla birlikdə hətta 1 il bundan əvvəl sızdırılmış bütün texniki xüsusiyyətlərin bir-bir təsdiqləndiyi ilə qarşılaşdıq. Əgər bu vaxta qədər iPhone 14 seriyası ilə bağlı sızdırılmış məlumatları oxumuşdunuzsa, bildiklərinizi bir yerə toplasanız iPhone 14 seriyasını başdan yarada bilərsiniz. Hətta deyə bilərik ki, iPhone tarixində bu seriya qədər dəqiq sızdırılmış məlumatlar hələ olmamışdı.
Əvvəlcədən deyildiyi kimi iPhone 14 mini modeli təqdim edilmədi. Elə iPhone 14 və iPhone 14 Plus, iPhone 14 Pro və iPhone 14 Pro Max modelləri qrup şəklində iki fərqli seqmentə xitab etməkdədirlər. Üst seqment cihazları adətən, 2 yerə ayırırıq. Birinci sinif cihazlar “üst seqment premium” smartfonları əhatə edib bütün güclü xüsusiyyətləri özündə birləşdirir. İkinci sinif isə zəiflədilmiş “sadə üst seqment” xüsusiyyətləri özündə toplayır. iPhone 14 seriyasındakı modellərdə də tam olaraq bunu müşahidə etmək olur. Modellər barədə danışmamışdan əvvəl iPhone 14 və iPhone 14 Plus, həmçinin iPhone 14 Pro və iPhone 14 Pro Max modellərinin ölçüləri xaricində tamamilə eyni cihazlar olduğunu qeyd etməliyik.
iPhone 14 seriyasındakı A15 Bionic və A16 Bionic çipsetlərinin həqiqəti
iPhone 14 və iPhone 14 Plus modellərinə performans cəhətdən baxsaq, A15 Bionic çipsetini əldə ediblər. Lakin xatırlayırsınızsa, A15 Bionic çipseti 2 fərqli modifikasiyada istifadə olunurdu. iPhone 13 və iPhone 13 mini modellərində 4 nüvəli qrafik çipinə sahib variantı işlədilərkən, iPhone 13 Pro və iPhone 13 Pro Max modellərində 5 nüvəli qrafik çipinə sahib A15 Bionic çipseti quraşdırılmışdı. İndiki iPhone 14 və iPhone 14 Plus modelləri də məhz həmin iPhone 13 Pro modellərində olan 5 qrafik nüvəli çipseti alıblar. Təqdimatda göstərilən 18% perofrmans artımı isə elə əslində, iPhone 13 Pro və iPhone 13 modelləri arasındakı 5 və 4 nüvəli qrafik çiplərinin performans fərqi olub. Yəni A15 Bionic çipsetində əlavə bir təkmilləşdirmə edilməyib.
Yeni A16 Bionic çipseti isə iPhone 14 Pro seriyası modellərə quraşdırılıb. 5nm TSMC istehsal prosesli bu çipset 16 milyard tranzistora sahibdir. 16 nüvəli neyron mühərriki saniyədə 17 trilyon proses emal edə bilər. 5 nüvəli qrafik çipi isə A15 Bionic ilə müqayisədə 50% daha yüksək performansa malikdir. Yenə A15 Bionic ilə müqayisə edildikdə 20% daha az enerji sərf edir. Apple, bu çipsetin rəqiblərindən 40% daha sürətli işlədiyini iddia edir. Lakin A16 Bionic və A15 Bionic çipsetlərinin geekbench nəzərən CPU performansı fərqi elə də çox görünmür. Mükəmməl bir üstünlük mövcud deyil. Həmçinin, A16 Bionic şirkətin üçüncü nəsil 5nm çipseti hesab edilir. Bundan əvvəl iPhone 12 və iPhone 13 seriyası da 5nm texnoloji prosesə əsaslanan çipsetlər almışdı.
Sadə iPhone 14 modelləri hələ də 60Hz ekran ilə gəlir
6.1 düymlük iPhone 14 və 6.7 düymlük iPhone 14 Plus modelləri ilə bağlı heyfisləndirən digər nüanslardan biri də ekran panelidir. Yüksək kontrast nisbətinə, geniş rəng dərinliyinə, 1200 nit parlaqlığa sahib bu 2 smartfon da 60Hz tezlikli Super Retina XDR OLED panellə təchiz olunub. 60Hz ekran batareyanın uzun müddət işləməsinə yaxşı təsir etsə də bu cihazlarda belə bir hal arzuedilməzdir. Apple tərəfindən verilən məlumata görə müəyyən şərtlər altında iPhone 14 Plus modelində 26 saat, iPhone 14 modelində 20 saat video izləyə bilərsiniz.
Lakin iPhone 14 Pro və iPhone 14 Pro Max modelləri dünyanın ən güclü ekran panellərindən birini, hətta birincisini əldə ediblər. Belə ki, bu panelin Samsung tərəfindən hazırlandığı bildirilir. M12 OLED adlı hələ heç bir brendin işlətmədiyi tamamilə yeni nəsil ekran texnologiyası olduğu deyilir. Hansı ki, gur işıq altında 2000 nit parlaqlığa yüksəlir. iPhone 14 Pro modelində 6.1 düymlük, iPhone 14 Pro Max modelində 6.7 düymlük ekran paneli mövcuddur. Texniki cəhətdən ikisi də eyni imkanlara malikdirlər. TPO Super Retina XDR OLED ekran paneli 1-120Hz arasında adaptiv dəyişən görüntü yeniləmə tezliyinə, həmişə açıq ekran xüsusiyyətinə və ağlınıza gələ biləcək bütün vacib standartlara sahibdir.
iPhone 14 seriyasındakı ən vacib yenilik isə elə ancaq Pro modellərində olan çərtiyin ləğv edilməsidir. Normal çərtiklə müqayisədə əslində, bu kapsul biraz daha aşağı sürüşüb. Çərtiyin ləğvi isə 30% daha kiçik selfi kamerasının quraşdırılması ilə mümkün olub. Lakin indiyə qədər smartfonlarda bu tip “selfi kamerasını” Apple qədər effektiv işlədən ikinci innovativ istehsalçı olmamışdı. Bu kapsul Apple tərəfindən Dinamik Ada (Dynamic Island) olaraq adlandırılır. Elə möhtəşəm animasiyalar yaradılıb ki, smartfonda baş verən çox şey ekranın üst hissəndəki kapsul ətrafında toplanır. Ekran çox keyfiyyətli olduğu üçün animasiyaların kapsul ətrafında böyüyüb kiçilməsi, mövhumi hissiyat yaratmır. iPhone 14 Pro və iPhone 14 Pro Max modellərinin animasiyalarını formalaşdıran iOS 16 yeniləməsi, digər cihazlara 12 sentyabrdan etibarən gələcək.
iPhone 14 Pro seriyası 48MP kameraya sahibdir
İlk olaraq iPhone 14 və iPhone 14 Plus modelləri barədə danışmağa başlayaq. Çünki, bu cihazlar iPhone 14 seriyası Pro modelləri ilə müqayisədə daha zəif xüsusiyyətlərə malikdirlər. iPhone 13 modeli ilə qarşılaşdırdıqda iPhone 14 və iPhone 14 Plus modelləri daha böyük sensor ölçüsünə malik, lakin yenə F/1.5 12MP təsvir ölçülü kameralar alıblar. iPhone 13 ilə müqayisədə 49% daha çox işıq alan əsas kamerası OIS texnologiyası ilə gücləndirilib. İkinci kamera isə ötən il çıxarılan iPhone 13 ilə birə-bir eyni 12MP təsvir ölçülü ultra-geniş bucaqlı kameradır. Ön tərəfdə isə yeni avtofokus dəstəkli 12MP TrueDepth selfi kamerası quraşdırılıb. Zəif işıqda selfi və ultra-geniş bucaqlı kamera 2 dəfə, əsas kamera isə 2.5 dəfə daha yaxşı performans göstərir.
iPhone 14 Pro və iPhone 14 Pro Max modellərində F/1.8 48MP təsvir ölçülü kamera sensoru quraşdırılıb. Sensor ölçüsü və Sony istehsalı hansı sensor olduğu tam dəqiq deyil. 48MP olmasına baxmayaraq, 4 pikseli birləşdirib 2.44μm ölçülü piksellərlə 12MP görüntülər qeydə alır. Videolarda telefoto kamerasına keçidi hamarlamaq və portret çəkilişlərində keyfiyyəti artırmaq üçün 2 qat optik (48MP sensor hesabına rəqəmsal da hesab edilə bilər) yaxınlaşdırma funksiyasına sahibdir. Qeyd edək ki, bu sensorun ölçüsü iPhone 13 Pro modellərindəkindən 65% böyükdür.
Digər 12MP təsvir ölçülü 3 qat optik yaxınlaşdıra bilən telefoto, 12MP təsvir ölçülü 120˚ ultra-geniş bucaqlı kameralar isə sabit qalıb. Həm əsas, həm telefoto kamerası OIS ilə gücləndirilib. Zəif işıq performansı isə ultra-geniş bucaqlı kamerada 3 dəfə, digər bütün kameralarda 2 dəfə yaxşılaşdırılıb.
Peyk bağlantısı, yeni təhlükəsizlik, batareya və digər xüsusiyyətlər
Şəbəkənizin işləmədiyi və təhlükəli bir vəziyyətdə qaldığınız zaman peyk bağlantısı işinizə yarayacaq. Kanada və ABŞ-də istifadəyə verilən yenilik iki il pulsuz işlədilə biləcək. Bu xüsusiyyəti bir gün əvvəl Huawei də Mate 50 seriyasında təqdim etdiyi üçün ilk hesab edilmir.
Qəza təhlükəsizliyi xüsusiyyəti isə Apple Watch 8 seriyası ilə eyni işləyir. Xüsusi akselerometr və 3 oxlu giroskop hesabına 256G qüvvəsinə qədər qəza təyini edilə biləcək. Qəza təyin edilərsə, 10 saniyə ərzində fövqaladə zəngi ləğv etməsəniz smartfonunuz lazımi yerlərə zəng edəcək.
iPhone 14 seriyası ABŞ bazarında fiziki sim yuvası olmadan satışa çıxarılacaq. Bunun üçün smartfonlar eSIM texnologiyasından istifadə edəcəklər. Birdən çox eSIM dəstəyi ilə nömrələriniz arasında asanlıqla keçid edə biləcəksiniz. Qlobal bazarda isə fiziki sim yuvasının olacağı gözlənilir.
Rəsmi məlumat verilməsə də iPhone 14 modelinin 3279 mAs, iPhone 14 Plus modelinin 4325 mAs, iPhone 14 Pro modelinin 3200 mAs, iPhone 14 Pro Max modelinin 4325 mAs batareyaya sahib olduğu deyilir. Sürətli şarj isə mövcud deyil. Sadəcə iPhone 14 Pro və iPhone 14 Pro Max modellərinin 30 Vatta qədər şarj olmağı bacardığı bildirilir. Bütün modellərdə isə 50 faizlik şarj üçün minimum 30 dəqiqə vaxt lazımdır.
Smartfonların qiyməti
Smartfonların qiyməti ABŞ bazarı üçün stabil qalsa da, Almaniya istinadən Avropa qiymətlərində ciddi yüksəliş görülür. ABŞ bazarında iPhone 14 modeli 800 dollar, iPhone 14 Plus modeli 899 dollar, iPhone 14 Pro modeli 999 dollar, iPhone 14 Pro Max modeli 1099 dollar başlanğıc qiymətlə təklif olunur. Hər biri 128GB yaddaş həcminə sahibdir.
Almaniya qiymətlərinə baxdıqda iPhone 14 modeli 999 avro, iPhone 14 Plus modeli 1149 avro, iPhone 14 Pro modeli 1299 avro, iPhone 14 Pro Max modeli 1499 avro başlanğıc qiymətlə təkıif olunur. Smartfonlar 16 sentyabrdan etibarən əlçatan olacaq.
Nəticə
iPhone 14 və ya iPhone 14 Plus modelini almağı düşünürsünüzsə bu çox məntiqli deyil. Bu cihazlar üçün büdcənizi yüksəltmək əvəzinə daha ucuz iPhone 13 alsanız bir fərq hiss etməyəcəksiniz. Eyni zamanda iPhone 12 və ya iPhone 13 modellərini işlədirsinizsə, həmin modellər üzərinə iPhone 14 və iPhone 14 Plus demək olar cüzi təkmilləşdirmələr almış bir üst variant olduğundan qətiyyən bu cihazlar sizi maraqlandırmayacaq. Yeni iPhone 14 və ya iPhone 14 Plus almaq yerinə məsələn, iPhone 12 Pro alsanız daha geniş kamera xüsusiyyətləri, iPhone 13 Pro alsanız 120Hz görüntü yeniləmə dəstəyi əldə edəcəksiniz.
iPhone 14 Pro və iPhone 14 Pro Max isə bəli, alınacaq cihazlardırlar. Büdcəniz iPhone 13 Pro modelinə çatırsa, iPhone 14 Pro üçün artırıb-artırmamaqda qərarsızsınızsa artırmağınız məntiqlidr. Lakin çərtik sizin üçün vacib detal deyilsə, daha az xərclə iPhone 13 Pro modeli ilə də istər performans, istər kamera cəhətdən oxşar təcrübə yaşayacaqsınız. Peşəkar məqsədlər üçün almırsınızsa, aradakı fərq üçün əlavə xərcə dəyməyəcək. Fikirlərinizi rəylərdə də bizimlə bölüşə bilərsiniz.
