Münasib qiymətli oyun smartfonu dedikdə bazarda ən güclü seçim indiyə qədər Redmi K Gaming seriyası və qlobal bazardakı qarşılığı POCO F GT modelləri olurdu. Lakin müəyyən bir həqiqət var ki, bu gün istifadəçilərin çox kiçik bir hissəsi oyun smartfonu almaqda maraqlıdırlar. Nəticə etibarilə onsuzda mobil cihaz alacaq biri flaqmana yaxın səviyyədə bir cihaz aldığı zaman istədiyi oyunu ən yüksək keyfiyyətdə oynamağı bacarır. Məhz oyun üçün smartfon almaq bir çox unikallığı itirməyinizə səbəb olur. Bunlardan ən başlıcası isə kamera performansı tərəfində verilən itkilərdir. Digər bir tərəfdən mobil oyun “kitabxanası” da xeyli zəif olduğundan oynamağı bir müddət sonra tərgidəcəyiniz bir neçə oyun üçün sırf oyun smartfonu almaq heç məntiqli görünmür. Beləliklə, Redmi brendi və dolayı olaraq qlobal bazardakı POCO brendinin bundan sonra oyun smartfonu ilə qarşımıza çıxmayacağı bildirilir.
Lu Weibing, bu barədə öz Weibo hesabında məlumat yayıb
Belə ki, 2023-cü ildə artıq oyun smartfonlarına ehtiyac olmayacağını bildirən Redmi brendinin direktoru Lu Weibing, bu smartfonların mənasız olduğunu qeyd edib. Onun sözlərinə görə onsuzda bu gün istehsal edilən Redmi K seriyası modellər (qlobal bazardakı POCO F4, Xiaomi 12T, Xiaomi 12T Pro və.s adlandırılmış cihazlar) onsuzda sahib olduqları “Snapdragon 8 Gen” və ya “MediaTek Dimensity” seriyası flaqman çipsetləri ilə mükəmməl oyun performansına malikdirlər. Nəticədə Redmi oyun smartfonlarına (qlobaldakı POCO F GT) heç bir ehtiyac qalmayıb.
Bəzi oyunçulara bu tip cihazlar xitab etsə də istər Redmi K40, istər Redmi K50 seriyası oyun smartfonları istifadəçilərin çox kiçik bir qismi tərəfindən maraqla qarşılanıb. Satış ədədləri isə gözləniləndən qat-qat aşağı olub. Ona görə də qarşıdan gələn Redmi K60 seriyası, yəni qlobal bazardakı POCO F5 seriyası heç bir oyun smartfonu ilə qarşımıza çıxarılmayacaq.
